ბასიანსა და კაფე გალერიში ხმაურიანი სპეცოპერაციიდან 2 წელი გავიდა. იმ დროს კლუბებიდან ძალის გამოყენებით გამოგდებულ და გაბრაზებულ ხალხს ეგონა, რომ ეს მოვლენა გარდამტეხი აღმოჩნდება ჰუმანური ნარკოპოლიტიკისთვის. მთავრობის მხრიდან დაპირებებიც გაიცა, თუმცა პროცესი ამ დრომდე გაყინულია.

2018 წლის 12 მაისს, დაახლოებით ღამის 12 საათზე თბილისის ორ ღამის კლუბში, ბასიანსა და გალერიში ერთდროულად დაიწყო სპეცოპერაცია. კლუბები დაატოვებინეს ყველა სტუმარს ისე, რომ პირადი ნივთების გამოტანის საშუალებაც არ მისცეს და არც დამატებითი განმარტებები გააკეთეს, რასაც პროტესტი მოჰყვა. პროტესტს პოლიციამ აგრესიით უპასუხა, რაც მასშტაბურ აქციებში გადაიზარდა.

შსს-მ პასუხად განცხადება გაავრცელა და აღნიშნა, რომ სპეცოპერაცია სამთვიანი საგამოძიებო პროცესის დასასრული იყო ნარკორეალიზატორების გამოსავლენად. სამართალდამცავებმა ნარკოდანაშაულის ბრალდებით რვა პირი დააკავეს.

პარლამენტის წინ ათასობით მოქალაქე შეიკრიბა, რომელმაც სახელმწიფოს ძალადობრივი მიდგომა კლუბურ ცხოვრებასთან ქუჩაში ცეკვით გააპროტესტა. გაჟღერდა მოთხოვნები გახარიას გადადგომის შესახებ.

მას შემდეგ, რაც პარლამენტთან შეკრებილმა ადამიანებმა დააანონსეს, რომ იქ გამართავდნენ აქციას 17 მაისსაც და შეუერთდებოდნენ მსოფლიოს, რომელიც ჰომოფობიისა და ტრანსფობიასთან ბრძოლის დღეს აღნიშნავს, დაანონსდა ნეონაცისტური და ძალადობრივი ჯგუფების აქციაც.

ამ ფორმით, მშვიდობიან აქციას კონტრაქცია გამოუჩნდა და ახალგაზრდა ფაშისტური იდეების მატარებლებმა პარლამენტთან შეკრებილების გამოხატვის თავისუფლების შეზღუდვა მოითხოვეს. კონტრაქციები გამართეს ნეონაცისტურმა ჯგუფებმა, ქართული მარშმა, მმკ-მ და სხვა აგრესიულმა ჯგუფებმაც.

ისინი თავისუფლების მოედნის გარშემო დარბოდნენ და აქციის მონაწილეებთან მისვლას ცდილობდნენ, თუმცა ყველა მხრიდან პოლიციის კორდონი ხვდებოდათ.

მრავალათასიანი აქციასა და ქალაქში ჩატარებულ სპეცოპერაციებზე ხელისუფლებამ პირველი განცხადება მხოლოდ 20 საათში გააკეთა. თბილისის მერმა სპეციალურ ბრიფინგზე თქვა, რომ საქართველოში ღამის ეკონომიკა აუცილებლად განვითარდება და კლუბური ცხოვრება, რომელიც წარმატებული ბიზნესია, აუცილებლად გაგრძელდება.

კიდევ ერთი ბრიფინგი უკვე სპეცოპერაციიდან 41 საათის გასვლის შემდეგ მთავრობის ადმინისტრაციაში ჩაინიშნა. თუმცა არც პრემიერმინისტრმა გიორგი კვირიკაშვილმაც გასცა პასუხი აქციის მონაწილეების მიერ დასმულ კითხვებს. თქვა მხოლოდ ის, რომ პარლამენტთან მდგომი ადამიანების გამოხატვის თავისუფლება დაცული იქნებოდა.

პრემიერის ბრიფინგიდან მალევე რუსთაველის გამზირზე წყლის ჭავლის გამშვები მანქანები და ხელკეტებითა და ფარებით აღჭურვილი სპეცრაზმელები გამოჩნდნენ. თანდათან ძლიერდებოდა კორდონები, რომელიც პარლამენტთან შეკრებილი ადამიანების დასაცავად იყო გავლებული.

რამდენიმე საათში აქციაზე იმჟამინდელი შინაგან საქმეთა მინისტრი, გიორგი გახარია მივიდა, რომელმაც საუბარი ბოდიშით დაიწყო და ორგანიზატორებთან მოლაპარაკებით გააგრძელა. შედეგად აქცია დაიშალა, თავისუფლებისთვის მებრძოლი აქტივისტები კი პარლამენტის ეზოდან ყვითელი ავტობუსებით გაიყვანეს "აგრესიული ჯგუფებისგან დასაცავად".

ამის შემდეგ გახარიამ იმაზე დაიწყო საუბარი, რომ კლუბური ცხოვრება ფხიზელ გონებაზეც შეიძლება და ეს სპეცოპერაცია მხოლოდ დასაწყისია.

აქტივისტებმა განაცხადეს, რომ მინისტრისგან ნარკოპოლიტიკის რეფორმაზე მუშაობის განახლების პირობა მიიღეს. მთავრობასთან რამდენიმე შეხვედრაც გაიმართა, თუმცა ამის შემდეგ ქმედითი ნაბიჯები აღარ გადადგმულა.