საქართველოს პარლამენტის იურიდიულ საკითხთა კომიტეტის თავმჯდომარე, ანრი ოხანაშვილი ამბობს, რომ სასამართლოს დამოუკიდებლობაზე Freedom House-ის ანგარიშის ტენდენცია აშშ-სა და ევროკავშირის განცხადებებს ეწინააღმდეგება. ამის შესახებ მან დღეს, 6 მაისს ანგარიშის შეფასებისას თქვა:

"უცნაურია, რომ Freedom House-ის ანგარიშში წარმოდგენილი გარკვეული ტენდენცია პირდაპირ წინააღმდეგობაში მოდის საქართველოში ამერიკის შეერთებული შტატების საელჩოსა და ევროკავშირის ოფიციალურ განცხადებებთან, რომლებიც მათ სასამართლო სისტემაში ჩვენი გუნდის მიერ გატარებულ რეფორმებთან დაკავშირებით გააკეთეს

სწორედ აშშ-ის საელჩოსა და ევროკავშირის განცხადებით, ქართული ოცნების გუნდის მიერ განხორციელებული რეფორმები, სასამართლო სისტემის მეოთხე ტალღა, შეფასებულია მნიშვნელოვან წინ გადადგმულ ნაბიჯად სასამართლო სისტემების მეტი დამოუკიდებლობისთვის, მეტი განვითარებისთვის და კიდევ უფრო მეტი გამჭვირვალობისთვის".

Freedom House-ის 6 მაისს გამოქვეყნებული ანგარიშის თანახმად, საქართველო ისევ ჰიბრიდული დემოკრატიის ქვეყანაა, თუმცა შარშანდელთან შედარებით დემოკრატიის განმსაზღვრელი ქულა, 3,29-დან 3,25-მდე შემცირდა. ანგარიშში წერია, რომ კლება სასამართლოს დამოუკიდებლობის სფეროს უკავშირდება:

"[საქართველოში] სასამართლოს დამოუკიდებლობის ქულა შემცირდა 3-დან 2,75-მდე, უზენაეს სასამართლოში ახალი მოსამართლეების სადავო დანიშვნისა და 2019 წლის ივნისის აქციების დასაშლელად პოლიციიის მიერ ძალის არაპროპორციულად გამოყენების გამო".

უზენაეს სასამართლოში მოსამართლეების უვადოდ დანიშვნის შემდეგ აშშ-ს საელჩომ განცხადება გაავრცელა, სადაც ეწერა რომ სიაში მოხვდა კანდიდატთა ის ნაწილი, ვინც "მოსმენებისას ვერ შეძლო საკმარისად წარმოეჩინა იურიდიული ცოდნა ან ერთგულება მიუკერძოებლობისადმი".

აშშ-ს საელჩომ განაცხადა, რომ იზიარებენ საერთაშორისო დამკვირვებლებისა და ქართველი ექსპერტების შეფასებას, კანდიდატთა შერჩევის არასაკმარისად გამჭვირვალობაზე.