ინფექციური საავადმყოფოს დირექტორის განცხადებით, სავსებით რეალურია ვარაუდი, რომ საქართველოში კორონავირუსით ინფიცირებულთა რაოდენობა იმაზე მეტია, ვიდრე ეს ოფიციალურად არის ცნობილი. ამის შესახებ თენგიზ ცერცვაძემ TV პირველის ეთერში გუშინ, 29 აპრილს ისაუბრა.

"თუ თქვენ იკითხავთ, რამდენად რეალურია ეს ციფრი იდენტიფიცირებულებთან და არაიდენტიფიცირებულებთან მიმართებაში, ძალიან ხშირად კითხულობენ ამას და მინდა შევიტანო სიცხადე — ის ვარაუდი, რომ მოსახლეობის შესაძლოა მეტი ნაწილი იყოს ინფიცირებული რეალურად, მათ შორის უსიმპტომო ფორმებით, ვიდრე ეს დღეს ჩვენ ვიცით, სავსებით რეალურია. ყველა ქვეყანაში დადასტურებული შემთხვევების გარდა, არსებობს დაუდასტურებელი შემთხვევების რაღაც რაოდენობა, მათ შორის, სავარაუდოდ, საქართველოშიც", — თქვა ცერცვაძემ.

მან ეს განცხადება გარდაცვლილთა რაოდენობაზე საუბრისას გააკეთა. ცერცვაძე ამბობს, რომ საქართველოში ცალსახად არის გარდაცვლილთა ძალიან მცირე რაოდენობა, განსაკუთრებით ევროპის ქვეყნებთან შედარებით.

"შეუდარებლად მცირეა, 10-ჯერ, 15-ჯერ, 18-ჯერ მცირე. თუ გადავითვლით ერთ მილიონ მოსახლეზე, ეს განსხვავება კიდევ უფრო დიდია. ჩვენთან 160-ჯერ ნაკლებია გარდაცვალება ერთ მილიონ მოსახლეზე, ვიდრე შეერთებულ შტატებში და 200-300-ჯერ ნაკლები, ვიდრე ვთქვათ, იტალიაში, ესპანეთსა და საფრანგეთში, უზარმაზარი განსხვავებაა", — აღნიშნა მან.

ინფექციური საავადმყოფოს დირექტორმა ასევე თქვა, რომ თუ საქართველოში ინფიცირებულების რეალური რიცხვი მეტია, მათ შორის უსიმპტომო და მცირე სიმპტომიანი ადამიანების ხარჯზე, "მარტივი მისახვედრია, მარტივი გამოსაანგარიშებელია, რომ მაშინ გარდაცვალების პროცენტი კიდევ უფრო დაბლა დაიწევს და არანაირად მაღლა არ აიწევს".