საბიბლიოთეკო გაერთიანებების საერთაშორისო ფედერაცია (IFLA), რომელიც ამ დარგში მსოფლიოს ყველაზე ავტორიტეტული ორგანიზაციაა, საქართველოს პარლამენტის ეროვნული ბიბლიოთეკის საერთაშორისო ორგანიზაციებთან ურთიერთობას სხვა ქვეყნების ბიბლიოთეკებისთვის სამაგალითოსა და წარმატებულს უწოდებს. ორგანიზაციის ანგარიშის ამ ნაწილში საქართველო პირველად მოხვდა.

IFLA-ს ახალ მოხსენებაში, რომელიც საქართველოს, ჩილეს, ხორვატიისა და მადაგასკარის გამოცდილებას გვიზიარებს, საქართველოს პარლამენტის ეროვნული ბიბლიოთეკის საქმიანობას განსაკუთრებული ყურადღება ეთმობა.

მოხსენებაში წერია:

"საქართველოს პარლამენტის ეროვნული ბიბლიოთეკა გამოირჩევა სხვადასხვა ქვეყნებთან თანამშრომლობის პოზიტიური გამოცდილებით. ბიბლიოთეკაში, ამერიკელ პარტნიორთა მხარდაჭერით შესაძლებელი გახდა ამერიკული სამკითხველო დარბაზის განახლება და ინგლისური ენის სწავლებისა და სხვა სიახლეების დანერგვა.

მნიშვნელოვანია, რომ არა მხოლოდ ამერიკის საელჩო, არამედ გერმანიისა და საფრანგეთის საელჩოებიც აქტიურად თანამშრომლობენ საქართველოს პარლამენტის ეროვნულ ბიბლოთეკასთან, რომლის სექციები მკითხველებს ამ ქვეყნების რესურსებით ემსახურება.

დახმარებისთვის მზადყოფნა გამოთქვა დიდი ბრიტანეთის საელჩომაც, რომელიც ამერიკის საელჩოსთან ერთად, ეროვნულ ბიბლიოთეკას ადგილობრივი და რეგიონული ბიბლიოთეკების განახლებაში ეხმარება.

კიდევ ერთხელ მოვიყვანთ საქართველოს პარლამენტის ეროვნული ბიბლიოთეკის დადებით მაგალითს, რომელმაც იტალიის საელჩოსთან ერთად, ახალი კოლექციები მოიზიდა უცხოეთის იმ ორგანიზაციებიდან, რომლებიც რემონტის გამო მკითხველებს ვერ იღებდნენ.

ასეთმა თანამშრომლობამ ბიბლიოთეკების უცხოეთში საქმიანობის გაფართოების საშუალებაც მოგვცა. საქართველოს პარლამენტის ეროვნულმა ბიბლიოთეკამ 50-ზე მეტი ქართული წიგნის კუთხე გახსნა მსოფლიოში, რითაც ქართველი და ქართული წარმომავლობის მწერლები წარმოადგინა, ასევე ურთიერთობები გააძლიერა.

ამ ბიბლიოთეკას რესურსებითა და წიგნებით, გამოფენებითა და პროგრამებით იაპონია, თურქეთი და ჩინეთიც ამდიდრებს. საბიბლიოთეკო გაერთიანებების საერთაშორისო ფედერაცია დიდ მადლობას მოახსენებს საქართველოს პარლამენტის ეროვნული ბიბლიოთეკის წარმომადგენელს მაია სიმონიშვილს დეტალურად მიწოდებული ინფორმაციისთვის და თანამშრომლობისთვის.

უნდა აღინიშნოს, რომ დასაწყისში ჩვენმა რესპონდენტმა ორგანიზაციებმა თანამშრომლობის გაფართოება ამერიკის შეერთებულ შტატებთან ერთად დაიწყეს, რომელსაც ბიბლიოთეკებთან მუშაობისთვის საგანგებო პროგრამაც აქვს. ვაშინგტონში მოქმედი ორგანიზაცია საელჩოებს მხარს უჭერს მსოფლიოს ბიბლიოთეკების განვითარებაში.

ეს გაკვეთილი მსოფლიოს ბიბლიოთეკებისთვის გასათვალისწინებელია — თანამშრომლობა ბიბლიოთეკების ინიციატივით შედგა. შეიძლება, ბევრი მცდელობაც დაგჭირდეთ, მაგრამ მოთმინება საქმიან შედეგამდე მიგიყვანთ. გამოიჩინეთ პროფესიონალიზმი და ორგანიზებულობა. საერთაშორისო ორგანიზაციებს გამჭვირვალობისა და ადმინისტრაციული წესების დაცვა მოეთხოვებათ, თქვენ ეს უნდა გაითვალისწინოთ. გაიზიარეთ ის მოლოდინები და საჭიროებები, რომლებიც საელჩოებსაც აქვთ"