მე ლადო გოგოლაძე ვარ. 33 წლის. ჟურნალისტი, ტაეკვონდოს ეროვნული ფედერაციის გენერალური მდივანი და რაც მთავარია, ორი უმაგრესი გოგოს მამა.

დღეს სახლში ყოფნით ვერავის გავაკვირვებ, რადგან ნახევარი საქართველო სახლში ვართ. სიმართლე რომ ვთქვა, სახლში ყოფნა მიყვარს. ჩემს გოგოებთან ერთად ბევრ დროს ვატარებ, რაც ჩვენ ურთიერთობას კიდევ უფრო ამტკიცებს.

გვანცა, ჩემი მეუღლე, მუშაობს, მისი სამსახური ისევ აგრძელებს მუშაობას. თითქმის მთელი დღე მე და 8 წლის ნენე ვართ სახლში. ნისიმე, რომელიც 11 თვისაა, ძირითადად ძიძასთან არის და ამიტომ სახლს მე და ნენე ვამაგრებთ.

ფოტო: UNFPA

მე დისტანციურად ვმუშაობ. სამსახურის საქმის შემდეგ საოჯახო საქმეების კეთებას ვიწყებ, რომელშიც ნენე, ყოველთვის აქტიურად მეხმარება. საქმის პარალელურად უამრავ რამეზე ვსაუბრობთ და ისე შეუმჩნევლად გადის დრო, ვერც ვიგებთ.

ფოტო: UNFPA

განსაკუთრებით, ჭურჭლის რეცხვა გვიყვარს, ცოტა ვწუწაობთ ხოლმე და ვერთობით. დანებს მე ვრეცხავ, ცოტა არ იყოს მეშინია ნენეს რომ ვანდო. ნენე ძირითადად თეფშებს რეცხავს, რაც კარგად გამოსდის და ბედნიერია.

ფოტო: UNFPA

მერე წიგნებს გადმოვალაგებთ და მტვერს ვწმენდთ. შეიძლება იფიქროთ, ყოველდღე საიდან ედება მტვერიო, მაგრამ იატაკის დასუფთავებისას ძალიან იმტვერება ხოლმე და ამიტომ ყოველთვის ვასუფთავებთ.

ფოტო: UNFPA

ამასობაში, გარეთ გაფენილი სარეცხიც შრება და მისი დაბინავების დრო დგება. ვიდრე დავაბინავებთ, მანამდე ვაუთოებთ. ნენეს ცოტა ეშინია დაუთოების, ჰგონია რომ ცხელი უთო ხელს დაწვავს. ჩემთან ერთად უფრო თამამად იქცევა, მაგრამ მარტო მაინც ფრთხილობს, ამიტომ ერთად ვკიდებთ ხოლმე უთოს ხელს.

ფოტო: UNFPA

მალე ნისიმეს მოსვლის დროც დგება. ძიძა მეზობლად ცხოვრობს. მე და ნენე ერთად მივდივართ წამოსაყვანად. ნისიმეს სახლში მოსვლა და სახლის თავდაყირა დადგომა ერთია. ძალიან ცელქი ვინმეა. მალე გვანცაც მოდის და ოთხივე ერთად ვერთობით. ნისიმე საოცრებებს სჩადის, თვითონაც უხარია და ჩვენც გვახალისებს, მაგრამ მალე ითენთება და იძინებს, მერე უკვე ტრიო — მე, გვანცა და ნენე, ვაწესრიგებთ სახლს.

იმედია, "შინაპატიმრობა" მალე დასრულდება და ისევ გავალთ გარეთ. ჩემს გოგოებთან ერთად საოჯახო საქმეების კეთება მინდა არასოდეს დასრულდეს და სულ, სულ ერთად ვაკეთოთ ყველაფერი.

კამპანია "კაცები ზრუნავენ" ხორციელდება გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია "Care Together"-ის მიერ, გაეროს ერთობლივი პროგრამის "გენდერული თანასწორობისათვის" ფარგლებში, შვედეთის მთავრობის ფინანსური მხარდაჭერით.