19 აპრილს მართლმადიდებელი ეკლესია აღდგომის დღესასწაულს აღნიშნავს. როგორც წესი, მორწმუნეები ეკლესიებში ღამისთევისთვის წინა საღამოს იკრიბებიან და სააღდგომო ლიტურგიას ესწრებიან. ლიტურგია რამდენიმე ნაწილისგან შედგება, პროცესი კი ზიარებით სრულდება.

წელს მთელ მსოფლიოს რელიგიური დღესასწაულების აღნიშვნა განსხვავებულ ფორმატში მოუწია. კორონავირუსის პანდემიის გამო, სხვადასხვა კონფესიის წარმომადგენლებმა ხალხმრავალ რიტუალებზე უარი თქვეს. მათ შორის იყვნენ მართლმადიდებელი ეკლესიებიც მთელი მსოფლიოს მასშტაბით, თუმცა საქართველო იმ უმცირესობაშია, რომელმაც რეკომენდაციები არ გაითვალისწინა და წირვა-ლოცვა თითქმის უცვლელად ჩაატარა.

მას შემდეგ, რაც ხელისუფლებამ საპატრიარქოს კანონის დარღვევის უფლება ოფიციალურად მისცა, ქვეყნის ყველზე დიდ ტაძარში მრევლისთვის ადგილების გამზადება დაიწყეს. ხალხმა სამების საკათედრო ტაძარში შეკრება 8-ის ნახევრიდან დაიწყო. მათ, სასულიერო პირებისგან განსხვავებით, ავტომობილით გადაადგილების უფლება არ აქვთ.

მრევლისთვის განკუთვნილი სკამები სამების საკათედრო ტაძართან. 19:45 საათი.

ფოტო: On.ge

სამების ეკლესიასთან მისულ მრევლს, რომელმაც სოციალურ დისტანციაზე უარი თქვა, ორმეტრიანი დისტანცია უნდა დაეცვა. მათ საპატრიარქოს წარმომადგენლებმა პირბადეები დაურიგეს.

სამების საკათედრო ტაძართან პირბადეებს არიგებენ

ფოტო: On.ge

ტაძართან განლაგებული სკამებისგან განსხვავებით, დისტანცია არ იყო საეკლესიო მაღაზიაში მყოფ მრევლს შორის — საკმაოდ პატარა სივრცეში ერთდროულად სამზე მეტი ადამიანი, სიმჭიდროვეში იმყოფებოდა.

მრევლი სამების საეკლესიო მაღაზიაში. დისტანცია დაცული არ არის. 18 აპრილი, 19:45.

ფოტო: On.ge

ამ დროისთვის ტაძარში სულ რამდენიმე ადამიანი იყო.

მრევლი სამების საკათედრო ტაძარში, 20:00 საათი.

ფოტო: On.ge

21:00 საათისთვის მრევლის რაოდენობა შედარებით გაიზარდა. შიგადაშიგ, იყო შემთხვევები, როცა ისინი დისტანციას არ იცავდნენ

ფოტო: On.ge

23:00 საათისთვის სამებაში კათოლიკოს-პატრიარქი მივიდა.

ფოტო: On.ge

მოგვიანებით, ილია მეორეს სააღდგომო ეპისტოლე წაიკითხეს. ის, ტრადიციულად, მიმდინარე საკითხებს გამოეხმაურა. მსოფლიო პანდემიის დროს ეკლესიაში შეკრებილ მრევლს პატრიარქმა მიმართა, რომ უფლის ნების გარეშე "თმის ერთი ღერიც არ დავარდება" და მით უმეტეს, "სიცოცხლეც და გარდაცვალებაც უფლის ხელშია".

ფოტო: კადრი ვიდეოდან / საზოგადოებრივი მაუწყებელი

მის სიტყვებს მრევლის ნაწილი ტაძრის ეზოდან ისმენდა

ფოტო: On.ge

ნაწილი კი შენობაში იმყოფებოდა

ფოტო: On.ge

ეპისტოლეს წაკითხვის შემდეგ სასულიერო პირებმა ლიტანიობისთვის ეკლესიის ეზოში გადაინაცვლეს. რიტუალის მიხედვით, მათ მრევლთან ერთად ტაძარს სამჯერ უნდა შემოუარონ, თუმცა კორონავირუსის გამო საპატრიარქომ წესები მცირედით შეცვალა და ცერემონიალში მხოლოდ სასულიერო პირები მონაწილეობდნენ.

ფოტო: On.ge

ტერიტორიზე იყვნენ საპატრულო პოლიციის წარმომადგენლებიც — ნაწილი სამსახურებრივ მოვალეობას ასრულებდა, ნაწილი კი პარალელურად ლოცულობდა.

ფოტო: On.ge

ტაძართან მიიყვანეს ღია ავტობუსებიც. არსებული ინფორმაციით, 19 აპრილს საპატრიარქო მსვლელობას გეგმას. დეტალები ამ დრომდე უცნობია.

ფოტო: On.ge

საეკლესიო რიტუალები სამების საკათედრო ტაძარში დაახლოებით 04:00 საათზე დასრულდა. მრევლს 06:00 საათამდე ტერიტორიის დატოვების უფლება არ აქვს.

ფოტო: On.ge

ამ დროისთვის რთულია საუბარი, რა შედეგს მოიტანს კორონავირუსის ეპიდემიის თვალსაზრისით მთავრობის მიერ ეკლესიასთან მორიგ დათმობაზე წასვლა. უცნობია, რამდენი ახალი შემთხვევა დადასტურდება მომდევნო 2-3 კვირაში, თუმცა სპეციალისტები პიკს ელოდებიან. ისინი ადამიანებს, ვინც ეკლესიებში იმყოფებოდნენ, მიმართავენ რეკომენდაციით, ორი კვირის განმავლობაში იყვნენ თვითიზოლაციაში.

ალბათ პიკის ხელიშემწყობი იქნებ ქუთაისის მოსახლეობის ნაწილიც. დღეს ჟურნალისტმა ირაკლი ვაჩიბერაძემ გაავრცელა ვიდეო, სადაც ჩანს, რომ სასულიერო პირები და მრევლი ლიტანიობის დროს ერთმანეთთან დისტანციას არ იცავენ.

შეგახსენებთ, რომ კორონავირუსის პანდემიის პირობებში, სპეციალისტების რეკომენდაციების მიუხედავად, საპატრიარქომ უარი თქვა მთავარი რეკომენდაციის შესრულებაზე და მრევლს სახლში დარჩენისკენ არ მოუწოდა, არც ეკლესიები დაკეტა დროებით. პირიქით, საქართველოს მთავრობა და ეკლესია შეთანხმდნენ, რომ აღდგომის ლიტურგიას მრევლიც დაესწრება.

დაავადებათა კონტროლის ეროვნული ცენტრის დირექტორის მოადგილის, პაატა იმნაძის თქმით, ინფიცირებულები, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მან ასევე აღნიშნა, რომ თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს. მეორე დღეს გამყრელიძემ მოსახლეობას მოუწოდა, რომ ეკლესიაში არ წავიდნენ და სახლში დარჩნენ. მისი თქმით, ერთხელ ტრადიციაზე უარის თქმის გამო, ღმერთი არ გაბრაზდება და ასე ქვეყანა გადაარჩენენ. მანვე სთხოვა ეკლესიას, რომ შეეცვალათ სააღდგომო ლიტურგიის ფორმატი.

ვირუსის ფართოდ გავრცელების საფრთხის შესახებ ეპიდემიოლოგებისა და ექიმების არაერთი მოწოდების მიუხედავად, მთავრობისა და საპატრიარქოს ერთობლივი გადაწყვეტილებაა, რომ აღდგომის ღამეს დიდ ეკლესიებში მრევლმა ორმეტრიანი დისტანცია დაიცვას, პატარა ტაძრებში კი ეზოში განაწილდეს. საპატრიარქოს პრესსამსახურის ხელმძღვანელის, ანდრია ჯაღმაიძის განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის თქმით, ტერიტორიაზე მობილიზებული იქნება პოლიცია.

ამ დროისთვის საქართველოში კორონავირუსის 388 დადასტურებული შემთხვევაა, მათ შორის გამოჯანმრთელდა 86, ხოლო გარდაიცვალა 4 ადამიანი. კარანტინის რეჟიმში იმყოფება 4971 პირი, სტაციონარში მეთვალყურეობის ქვეშ კი — 519.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: