"როგორც ბრალდების საქმე, ისე სასამართლოს გადაწყვეტილება, პოლიტიკოსის დასჯასა და ოპოზიციური ფიგურების დევნას ემსახურება" — ასე ეხმაურება სოციალური სამართლიანობის ცენტრი კოალიცია ცვლილებისთვის ლიდერის, ნიკა გვარამიას დაკავებას.

ორგანიზაციის განცხადებით, წულუკიანის კომისია სრულად პოლიტიკური ანგარიშსწორების ხასიათს ატარებს. სოციალური სამართლიანობის ცენტრი აღნიშნავს, რომ დროებით საგამოძიებო კომისიაზე დაბარებული პირის გამოუცხადებლობის გამო, მისი პასუხისმგებლობის საკითხის საკანონმდებლო მოწესრიგება უკიდურესად ხარვეზიანი და პრობლემურია.

"ბოლო პერიოდში, პოლიტიკური პარტიების ლიდერების დაპატიმრების ტენდენცია საგანგაშო წერტილს აღწევს. ქვეყნის ოპოზიციური ფიგურების მნიშვნელოვანი ნაწილი, სისხლის სამართლის საქმეებზე ბრალდებულის სტატუსს ატარებს, იმ ქმედებისთვის, რომლის დანაშაულებრივი ხასიათი, როგორც მინიმუმ, უკიდურესად სადავოა. აშკარაა, რომ ქართული ოცნება ოპოზიციისა და კრიტიკულად განწყობილი პირების დაშინებისა და დევნის მიზნით მოქმედებს და სისხლისსამართლებრივი მექანიზმების გამოყენება პოლიტიკური მოტივით, ოპონენტების განეიტრალების მიზნით ხდება, რაც კონსოლიდირებული ავტორიტარიზმის დამყარების და საწინააღმდეგო აზრის გაქრობის მცდელობის მკაფიო ნიშანია" — აღნიშნულია განცხადებაში.

შეგახსენებთ, სასამართლომ კოალიცია ცვლილებისთვის ერთ-ერთ ლიდერს, ნიკა გვარამიას პატიმრობა შეუფარდა — გადაწყვეტილება მოსამართლე ჯვებე ნაჭყებიამ მიიღო. გვარამიამ ქართული ოცნების დროებითი საგამოძიებო კომისიაზე გამოუცხადებლობისთვის დაწესებული 30 000-ლარიანი გირაო არ გადაიხადა. ბრალდებულს სისხლის სამართლის კოდექსის 349-ე მუხლით ედავებოდნენ, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

ნიკა გვარამია სასამართლო სხდომას არ ესწრებოდა, მას დღეს პატიმრობა შეუფარდეს და ის რუსთავის მე-12 პენიტენციურ დაწესებულებაში თავისით მივიდა.

ასევე იხილეთ: