ტომ მური, იგივე კაპიტანი ტომი, მეორე მსოფლიო ომის ვეტერანია, რომელმაც შეძლო და ბრიტანეთის ეროვნული ჯანდაცვის სისტემის დასახმარებლად 15 მილიონ დოლარზე მეტი შეაგროვა.

ამ ყოფილ სამხედროს თვის ბოლოს 100 წელი უსრულდება, ჰოდა, ამ ფაქტის აღსანიშნავად გადაწყვიტა, საქველმოქმედო მიზნებისთვის თანხა შეეგროვებინა: თავად საკუთარი თავი ეზოში დამოუკიდებლად სეირნობაში გამოიწვია და თუ ამ დავალებას წარმატებით გაართმევდა თავს და დაამტკიცებდა, რომ თავს კვლავ მხნედ გრძნობს, მაშინ სურვილის შემთხვევაში სხვებს საქველმოქმედო ფონდში თანხა უნდა გადაერიცხათ.

როგორც CNN წერს, ტომ მურის მიზანი იყო, რომ თავის დაბადების დღეზე ამ წამოწყებით 1000 გირვანქა სტერლინგი შეეგროვებინა, თუმცა საბოლოოდ აღმოჩნდა, რომ მისმა წამოწყებამ გაცილებით მეტ ადამიანს უბიძგა ქველმოქმედებისკენ: ჯამში სულ 12.7 მილიონი გირვანქა სტერლინგი (15.8 მილიონი დოლარი) შეგროვდა.

როგორც აღმოჩნდა, შემოწირულობა 648 000-ზე მეტმა ადამიანმა გაიღო. მათ მიერ შეგროვებული თანხა კი მთლიანად დიდი ბრიტანეთის საავადმყოფოების, მათი თანამშრომლებისა და პაციენტების დახმარებას მოხმარდება.

"ის წარსულშიც თავის ქვეყანას ემსახურებოდა და ახლაც პირნათლად მოიხადა თავისი ვალი", — განაცხადა ბრიტანეთის ჯანდაცვის მინისტრმა, მეთ ჰენკოკმა.

ტომ მური მეორე მსოფლიო ომის დროს ბრიტანეთის ჯარში ინჟინრად მსახურობდა ინდოეთში, ინდონეზიასა და ბრიტანეთში.