საქართველოს ჟურნალისტური ეთიკის ქარტია ევროკავშირისა და გაეროს განვითარების პროგრამის ფარგლებში, საარჩევნო მონიტორინგის მეოთხე ანგარიშს აქვეყნებს, რომლის მიხედვით, ბოლო ორ საანგარიშო პერიოდში საერთო ტენდეცია გამოიკვეთა – სუბიექტების მიმართ დადებითი ტონით გაშუქების შემცირება.

ანგარიში მოიცავს შედეგებს 26 სექტემბრიდან 2 ნოემბრის ჩათვლით.

ანგარიშის თანახმად, ახალი ამბების გაშუქების კუთხით, საანგარიშო პერიოდში არხებმა ყველაზე დიდი დრო პოლიტიკურ პარტიებს დაუთმეს, მაშინ როცა წინა საანგარიშო პერიოდებში სამონიტორინგო არხების უმრავლესობა საკუთარი ეთერის ყველაზე მეტ ნაწილს საქართველოს მთავრობის საქმიანობის გაშუქებას უთმობდა:

"წინამდებარე საანგარიშო პერიოდში 11 არხიდან ცხრა არხმა ყველაზე მეტი დრო ნაციონალურ მოძრაობას დაუთმო. 11 არხის მონაცემების მიხედვით, მთავრობა ყველაზე დადებითად GDS-ის ეთერში გაშუქდა, 11 პროცენტით. აღსანიშნავია, რომ პერიოდში მთავრობის დადებითი გაშუქებით მაესტრო და ობიექტივი ლიდერობდნენ, 8-8 პროცენტით. ყველაზე მეტი უარყოფითი გაშუქება მთავრობას წინა პერიოდების მსგავსად ისევ რუსთავი 2-ზე აქვს – დათმობილი დროის 50%".

ანგარიშის მიხედვით, ქართული ოცნება ყველაზე დადებითად წინა პერიოდის მსგავსად ისევ GDS-ის ეთერში ჩანდა, მისთვის დათმობილი დროის 4 პროცენტი პოზიტიური იყო, ნეგატიურად ქართული ოცნება ყველაზე დიდი დოზით რუსთავი 2-ს ეთერში გაშუქდა.

მონიტორინგით ასევე დადგინდა, რომ ერთიანი ნაციონალური მოძრაობა დადებითი ტონით 11-დან ოთხ არხზე დაფიქსირდა, იგი ყველაზე უარყოფითად ობიექტივმა გააშუქა.