სტრატეგიული ჟანრის კომპიუტერული თამაში Civilization პირველად 1991 წელს გამოვიდა და გეიმერების გული მალევე დაიპყრო.

კომპანია Fraxis Games და პროდიუსერი და გეიმ-დიზაინერი სიდ მაიერი თითქმის ყოველ წელს უშვებენ განახლებას.

ამჟამად, თამაშის 5 ძირითადი ვერსიაა გამოსული და თითოეულ მათგანს ორი ან სამი დამატება მოჰყვება.

კომპანია თამაშის მეექვსე ძირითად ვერსიაზე მუშაობს. ახალი თამაშის შესახებ, ონლაინ გამოცემა PCGamer-ის ჟურნალისტი ფილ სევიჯი, Civ 6-ის მთავარ გეიმ-დიზაინერს, ედ ბიჩს ესაუბრა. გთავაზობთ ინტერვიუს თარგმანს:

ოთხი ქალაქის სტრატეგია მოთამაშეების ხრიკია.

საქმე ისაა, რომ ყოველი ახალი ქალაქის დაარსებისას თქვენ მიერ მართული სახელმწიფოს მოსახლეობის უკმაყოფილება იზრდება. შესაბამისად, თუ ბევრ ქალაქს დააარსებთ, პროტესტის ტალღა იზრდება და საბოლოოდ სანქციებიც შეიძლება დაგიწესდეთ, რაც თქვენი ცივილიზაციის განვითარებას შეანელებს. ამიტომ მოთამაშეები, როგორც წესი, მაქსიმუმ ოთხ ქალაქს აარსებენ ხოლმე.

"ამ პროექტზე დეველოპერების ის გუნდი მუშაობს, რომელმაც Civilization 5 და მისი ბოლო დამატება Brave New World-ი შექმნა", ამბობს ედი. "მუშაობისას ჩვენ დავინახეთ, რომ მოთამაშეებს რამდენიმე მთავარი გამაერთიანებელი ფაქტორი აქვთ. ცივილიზაცია 5-ს თითქმის ყველა ერთნაირად თამაშობს. გეიმერები ოთხი ქალაქის სტრატეგიას ირჩევენ. თამაშში რამდენიმე პოლიტიკური ხეა, რომელთა განვითარების დროსაც ოთხი ქალაქით თამაში გამართლებულია, მაგრამ არსებობს სხვა მიმართულებებიც, რომლებსაც მოთამაშეები არ იყენებენ, არადა ამ შემთხვევებში მეტი ქალაქის დაარსება უფრო გამართლებულია."

დეველოპერებს სურთ, რომ თამაშის ახალ ვერსიაში ასეთი კლიშეები არ არსებობდეს, ამიტომ შიდა პოლიტიკა და სახელმწიფოზე მოქმედი ფაქტორები სხვა დინამიკას შეიძენს.

ქალაქები უბნებად დაიყოფა

ქალაქი civilization 6-ში

ფოტო: სკრინშოტი თამაშიდან

თითოეული შენობა შესაბამის უბანში განთავსდება. მაგალითად, უნივერსიტეტი, ბიბლიოთეკა, კვლევითი ლაბორატორია, ობსერვატორია და მსგავსი შენობები სამეცნიერო უბანში ჩაიდგმება. რომელი უბანი ქალაქის რომელ ნაწილში აშენდება, ეს მოთამაშის გადასაწყვეტი იქნება. ყველა სფეროს შესაბამისი უბანი ექნება. ქალაქში ინდუსტრიული, სამხედრო, რელიგიური და სხვა სახის ზონების შექმნა შეგეძლებათ:

"შესაძლებელი იქნება 10-12 ტიპის უბნის აშენება", ამბობს ედ ბიჩი. "უბნის განსათავსებლად არსებობს კარგი და ცუდი ადგილები. მაგალითად, მთაზე აშენებული სამეცნიერო ან რელიგიური ზონა დამატებით ბონუსს მოგიტანთ ტექნოლოგიის შესწავლის ან რწმენის განმტკიცების პროცესში."

ტექნოლოგიების კვლევა უფრო აქტიური პროცესი იქნება

ფოტო: სკრინშოტი თამაშიდან

თამაშის წინა ვერსიებისგან განსხვავებით, ტექნოლოგიური განვითარება დამოკიდებული აღარ იქნება ცივილიზაციის საერთო სამეცნიერო ქულებზე.

"თუ მშენებლობისა და კონსტრუქციის შესწავლა მოგინდებათ, ქვის სამტეხლო უნდა ააშენოთ. თქვენი მოქალაქეები თან იმუშავებენ და თან ტექნოლოგიას შეისწავლიან", განაცხადა ბიჩმა.

იგივე წესი მოქმედებს სხვა ტექნოლოგიების შესწავლისასაც. მაგალითად, თუ ზღვაოსნობის გამოკვლევა მოგინდებათ, უნდა შექმნათ სათევზაო ნავები, პატარა ზომის საზღვაო ტრანსპორტები და თქვენს მოსახლეობას ასე შეასწავლოთ ახალი ტექნოლოგია.

დიპლომატია გართულდება

ფოტო: სკრინშოტი თამაშიდან

მოწინააღმდეგე ხელოვნური ინტელექტს უფრო გამოკვეთილი პერსონალური თვისებები და ისტორიული მისწრაფებები ექნება. მოთამაშეებს მეზობელ სახელმწიფოებთან ურთიერთობისას სიფრთხილის გამოჩენა მოუწევთ:

"დააკვირდით სხვა მოთამაშეებს და შეისწავლეთ მოწინააღმდეგის რეაქციები და მისწრაფებები. ეცადეთ გაშიფროთ მათი ჩანაფიქრი და შესაბამისად იმოქმედოთ. გაარკვიეთ რა გააღიზიანებს ან ასიამოვნებს ამა თუ იმ ლიდერს."

თითოეულ მათგანს უნიკალური და სახასიათო თვისებები ექნება, მაგრამ ეს არ ნიშნავს, რომ მათი ქცევების წინასწარ განჭვრეტა ადვილი იქნება. ედ ბიჩის თქმით, განდი, რა თქმა უნდა, ყველასთან შედარებით მშვიდობის მოყვარული იქნება, მაგრამ მას ბნელი მხარეებიც ექნება.

თამაშს სხვა ბევრი ახალი ფუნქციაც დაემატება და უფრო რეალისტური გახდება.

Civilization 6 2016 წლის 21 ოქტომბერს გამოვა.