თუ ადამიანი უღირსად ეზიარება, შეიძლება ავად გახდეს, მაგრამ ღირსეულად ნაზიარები ადამიანები ავრცელებენ სიჯანსაღეს

ჭიათურისა და საჩხერის ეპარქიის მიტროპოლიტი, მეუფე დანიელი ამტკიცებს, რომ ადამიანი ზიარებისას ავად იმ შემთხვევაში გახდება, თუ "უღირსად" ეზიარება, ხოლო "ღირსეულად" ნაზიარები ადამიანები "სიჯანსაღეს" ავრცელებენ. ამის შესახებ მან სამების ტაძარში ჟურნალისტებს განუცხადა.

მისივე თქმით, სწორედ ასეთ ადამიანებზე დგას საქართველო და ამიტომაა, რომ კორონავირუსის გავრცელების დინამიკა მაღალი არაა.

"თუ ადამიანი, ოდნავ მაინც ავად არის და არ იცის ამის შესახებ და ის მოვა ეკლესიაში, ის განიკურნება. პირიქით, ასეთი ადამიანები, რომლებიც სულიწმიდის მადლით არიან აღვსილნი, როდესაც გარეთ გადიან, ისინი ავცრელებენ სულიწმიდის მადლს, ეს მადლი კურნავს საზოგადოებას. თუ ადამიანი ურწმუნოა, მისთვის ეს გაუგებარია, მაგრამ ჩვენი მოსახლეობის აბსოლუტური უმრავლესობა მორწმუმენეა და რასაკვირველია, აქ შიში არ უნდა იყოს. პირიქით, ეკლესიასთან სწორი კავშირია", — განაცხადა მეუფე დანიელმა.

დღეს მართლმადიდებელი ეკლესია ხარების დღესასწაულს აღნიშნავს. მიუხედავად საგანგებო მდგომარეობისა, დილიდან სამების საკათედრო ტაძარში ლიტურგია ტარდება, რომელსაც სხვადასხვა ეპარქიის მღვდელმთავრები და მრევლი ესწრებიან. ტაძარში სოციალური დისტანციისთვის მრევლი სპეციალურად მონიშნულ ადგილზე დგას.

პირველ აპრილს პატრიარქმა ილია მეორემ გაავრცელა მიმართა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 195 შემთხვევაა დადასტურებული. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.