თეოლოგი, ყოფილი მღვდელი, ბასილ კობახიძე ამბობს, რომ სახელმწიფომ მოლაპარაკებები უნდა დაიწყოს ეკლესიასთან, შესთავაზოს, რასაც არჩევნების დროს სთავაზობს და ეკლესიები დააკეტინოს. ამ თემაზე მან სპეციალურ ვიდეო მიმართვაში ისაუბრა.

"ჩვენს ხელისუფლებას არ აქვს ძალა, რომ დაკეტოს ეკლესიები ან აიძულოს საპატრიარქო, რომ თვითონ დაკეტოს. ამიტომ, როდესაც არჩევნების დროს აღწევენ ხოლმე, კულუალური, საიდუმლო მოლაპარაკებებით თავის მიზნებს, ახლაც უნდა ჩაატაროს ეს მოლაპარაკებები. უკვე გვიანაც კია. უნდა ჩაატაროს ეს მოლაპარაკებები საპატრიარქოსთან, დაჰპირდეს, რასაც ჰპირდება არჩევნების დროს და დააკეტინოს თვითონ პატრიარქს, ერთი თვით, თვე-ნახევრით ადამიანების ცხოვრების გამო", — თქვა ბასილ კობახიძემ.

კობახიძის თქმით, ელიტარულ პოლიტიკურ თუ საეკლესიო ჯგუფებს საფრთხე არ ემუქრებათ, რადგან მათ მკურნალობის პრობლემა არ ექნებათ. მისი აზრით, მმართველ გუნდი ფიქრობს, რომ ეკლესია ისევ დასჭირდებათ.

ბასილ კობახიძემ ვიდეო მიმართვაში აღნიშნა, რომ მრევლისთვის მინისტრებს არანაირი ავტორიტეტი არ აქვთ და ისინი მათ განცხადებას, რომ სახლში ილოცონ, არ დაიჯერებენ. მისი განმარტებით, ეკლესია არის სახელმწიფო სახელმწიფოში და ურჩხულივით აზის საქართველოს მრავალი ათეული წელია.

6 აპრილის მონაცემებით, საქართველოში კორონავირუსით ინფიცირების 188 შემთხვევაა დაფიქსირებული. მათგან ორი პაციენტი გარდაიცვალა, 39 კი უკვე გამოჯანმრთელდა. ამ დრომდე კარანტინის რეჟიმში რჩება 5 056 ადამიანი, სტაციონარში მეთვალყურეობის ქვეშ — 386.

კორონავირუსი დაუდასტურდა საჩხერის მერის ცოლს, რომელიც საჩხერის კლინიკის ექიმია. მერი ბენიამინ ფალავანდიშვილი აცხადებს, რომ ინფორმაციის მიღების შემდეგ, თვითიზოლაციაში იმყოფება. ბოლო 2 კვირის განმავლობაში მას არაერთი შეხება ჰქონდა სხვადასხვა პირთან, თუმცა როგორც მუნიციპალიტეტის გავრცელებულ ფოტოებში ჩანს, ის პირბადით და ხელთათმანებით მოძრაობდა.

ჯერ კიდევ აქტუალურ საკითხად რჩება ეკლესიებში წირვა-ლოცვის ჩატარებისას მრევლის დასწრება. როგორც საპატრიარქო აცხადებს, ისინი იცავენ ყველა რეკომენდაციას და ღვთისმსახურების დროს მრევლს მოუწოდებენ, დისტანცია დაიცვან. საპატრიარქოს საზოგადოებასთან ურთიერთობის დეპარტამენტის ხელმძღვანელი, ანდრია ჯაღმაიძე ამბობს, რომ არ მიუღიათ გადაწყვეტილება, თუ რა იქნება აღდგომის დღესასწაულზე, რადგან სიტუაციის განმუხტვას ელოდებიან. მისივე თქმით, კომენდანტის საათის დროს მორწმუნე სახლში უნდა იყოს.

კორონავირუსის გავრცელების პრევენციისთვის საქართველოში 21 მარტს საგანგებო რეჟიმი გამოცხადდა და დამატებითი შეზღუდვები დაწესდა. აღნიშნული ზომები 31 მარტის შემდეგ გამკაცრდა, როდესაც პრემიერ-მინისტრმა გიორგი გახარიამ "ფაქტობრივი კარანტინი" გამოაცხადა. ამოქმედდა ე.წ. კომენდანტის საათი და სამზე მეტი ადამიანის შეკრება აიკრძალა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: