დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ვიცე-პრემიერმა და ინფრასტრუქტურის მინისტრმა მაია ცქიტიშვილმა განმარტა, თუ საინდა მოიძიებს მთავრობა ეკონიმიკის დასახმარებლად ორ მილიარდ ლარს. მინისტრის თქმით, შემცირდება მიმდინარე ხარჯები და გადაიხედება 2020 წელს დაგეგმილი პროექტები. ასევე, მთავრობა კრიზისულ ვითარებაში საერთაშორისო საფინანსო ინსტიტუტებიდან გამოყოფილ დახმარებაზეც საუბრობს.

"როდესაც ვესაუბროთ 14-მილიარდიანი ბიუჯეტიდან 2 მილიარდის გამოყოფაზე, გასაგებია, რომ ძალიან ბევრი ინიციატივა და პროგრამა, რომელიც ჩვენ გვქონდა გათვალისწინებული, მიმდინარე და ადმინისტრაციული ხარჯები შემცირება", — აღნიშნა მან.

ცქიტიშვილის თქმითვე, შეიქმნება კრიზისული ბიუჯეტი, რომელიც საბოლოო ფორმას მას შემდეგ მიიღებს, რაც განისაზღვრება ვირუსთან ბრძოლის საჭირო პერიოდი, ცნობილი გახდება ის სიმძიმე, რომელიც დააწვება ბიზნესს და იმ ღონისძიებების მოცულობა, რომელიც მთავრობამ უნდა გაიღოს.

"ჩვენი ეკონომიკა არ არს სუპერ ეკონომიკების რანგში. ჩვენ ვიცით, რომ ჯერ კიდევ ჩვეულებრივ დროსაც გვჭირდებოდა საერთაშორისო პარტნიორების დაფინანსება, თუნდაც მსხვილი ინფრასტრუქტურული პროექტების განსახორციელებლად. როდესაც ჩვენ საქმე გვაქვს გლობალურ პანდემიასთან, როლის შეფასება ჯერ კიდევ უჭირთ საერთაშორისო საფინანსო ინსტიტუტებსა და დიდ ქვეყნებს, ჩვენ შეგვიძლია მხოლოდ გავაკეთოთ რეაგირება იმ კონკრეტულ ამოცანებსა და საჭიროებებზე, რომლებსაც ვხედავთ ამ ეტაპზე", — აღნიშნა მაია ცქიტიშვილმა.

დღეს, პირველ აპრილს პრემიერ-მინისტრმა, გიორგი გახარიამ განაცხადა, რომ ეკონომიკის პირდაპირი დახმარებისთვის 2 მილიარდი ლარი გამოიყოფა. მისივე თქმით, ეს დახმარება მიმართული იქნება, როგორც სამუშაო ადგილების, ასევე კომპანიებისა და მიმდინარე წარმოების შესანარჩუნებლად.

"ფაქტობრივი კარანტინი და კომენდანტის საათი" — რა შეზღუდვები დაწესდა და რისი უფლება გაქვთ

30 მარტს პრემიერ-მინისტრმა, გიორგი გახარიამ თქვა, რომ საგანგებო მდგომარეობის ფარგლებში ზომები მნიშვნელოვნად გამკაცრდება. მან აღნიშნა რომ, "ფაქტობრივად კარანტინს" აცხადებენ, რომელიც 31 მარტის 8 საათიდან ამოქმედდა და ასევე "ფაქტობრივ კომენდანტის საათს" ითვალისწინებს.

რაც შეეხება შეზღუდვებს:

• 21 საათიდან დილის 6 საათამდე იკრძალება როგორც ქვეითად, ასევე, პირადი ტრანსპორტით ან ტაქსით გადაადგილება. თუმცა, მათ ვინც სადღეღამისო დაწესებულებებში მუშობს, მისცემენ სპეციალურ საშვს, რომლის მისაღებადაც უნდა დარეკოთ მთავრობის ცხელ ხაზზე — 144;
• სრულად იკრძალება ნებისმიერი ტიპის საზოგადოებრივი ტრანსპორტით (მათ შორის მეტროთი) გადაადგილება როგორც ქალაქებსა და მუნიციპალიტეტებს შიგნით, ისე — ქალაქებს შორის. დასაშვებია მსუბუქი ავტომობილებით და ტაქსით მგზავრობა, მხოლოდ იმ შემთხვევაში, თუ ავტომობილში იქნება მხოლოდ 3 ადამიანი და 2 იჯდება უკანა სავარძელზე. სტრატეგიული მნიშვნელოვანი ობიექტების თანამშრომლების ორგანიზებული გადაყვანა დასაშვები იქნება. ამასთან, მთავრობის მიერ ნებადართულ საწარმოებში მუშაობის წესი ცალკე იქნება გაწერილი და ექნებათ ცალკე პროტოკოლები;

• იკრძალება 3-ზე მეტი პირის თავშეყრა, გარდა სასურსათო მაღაზიებისა და აფთიაქისა, სადაც სავალდებულოა დაცული იყოს 2-მეტრიანი სოციალური დისტანცია;

• იკრძალება 70 წელს ზემოთ მოქალაქეების სახლიდან გასვლა, გარდა იმ შემთხვევებისა, როდესაც ისინი მიდიან უახლოეს სასურსათო მაღაზიებში, უახლოეს აფთიაქსა ან უახლოეს სამედიცინო დაწესებულებაში. იმ შემთხვევაში, თუ 70 წელს გადაცილებული მოქალაქეები არიან მარტოხელები მათ მუნიციპალიტეტები, ეკონომიკის ან ჯანდაცვის სამინისტრო უნდა დაეხმაროს;
• ნებისმიერ მოქალაქეს, ნებისმიერ დროს, ქალაქში გადაადგილებისას თან უნდა ჰქონდეს პირადობის დამადასტურებელი დოკუმენტი.

გარდა ამისა უწყებათაშორისი საბჭოს გადაწყვეტილებების განსახორციელებლად ოპერატიული მართვის შტაბი შეიქმნა. ასევე, 7 ქალაქში პირთა გადაადგილების კონტროლისა და თერმოსკრინინგისთვის საკონტროლო პუნქტები მოეწყობა. ესენია: თბილისი, ქუთაისი, ბათუმი, რუსთავი, ფოთი, ზუგდიდი და გორი.

სხვა შეზღუდვები და სიახლეები:

• კარანტინის წესების განმეორებით დამრღვევი პირები ცალკე დაწესებულებაში იქნებიან
• პენიტენციურის 780 თანამშრომელი საპატიმროებში იცხოვრებს და ტერიტორიას არ დატოვებს
• "ოჯახის ექიმები უახლოეს დღეებში ვირუსისგან დაცვის წინა ხაზის ძირითადი მებრძოლები გახდებიან"
• "მომუშავე ადამიანები უნდა გადაადგილდნენ დამსაქმებლის ან პირადი ტრანსპორტით"

პრემიერმა განაცხადა, რომ ზემოთაღნიშნულ შეზღუდვები ისევე, როგორც სხვა პრევენციული ღონისძიებები ტარდება იმისთვის, რომ "უხერხულობა არ შევუქმნათ არც ჩვენს მრევლს, არც ეკლესიას და არც რიგით მოქალაქეებს." მისივე თქმით, სურვილი აქვთ არსებულ სიტუაციას აღდგომის დღესასწაულებამდე გაუმკლავდნენ, თუმცა გარანტიები არ არსებობს. მთავრობისა და სამედიცინო სფეროს წარმომადგენლების თქმით, უკვე დაფიქსირდა შიდა გავრცელება და 3 პირის ინფიცირების წყარო უცნობია.

პრემიერ-მინისტრის თქმით, ინფიცირებულს შორისაა სამედიცინო სექტორის წარმომადგენელი, რომელსაც ვირუსი სამსახურებრივი მოვალეობის შესრულების დროს გადაედო.