ჩრდილოეთ ამერიკის ეპარქიის ეპისკოპოსის, მეუფე საბას თქმით, სინოდის წევრები კარგად ვერ იაზრებენ იმ საშიშროებას, რის წინაშეც ქვეყანა შეიძლება ქვეყანა აღმოჩნდეს.

მისი თქმით, თავადაც სინოდის წევრია და არ სურს, რომ მისი პოზიცია სინოდთან დაპირისპირებად აღიქვან, თუმცა, დღეს არსებობს სახელმწიფოს ერთიანი რეგულაციები და ს მისი დაცვა საჭიროა.

"არავინ არის დაზღვეული ამ ვირუსისგან, არც ეპისკოპოსი, არც მღვდელი, არც ურწმუნო, არც მორწმუნე. ვირუსმა არ იცის ეს. ჩვენ დაავადების დროს უნდა გავითვალისწინოთ ეს რეგულაციები. რატომ ვსვამთ ზამთრის პერიოდში, როცა სხვადასხვა ვირუსია, ხან ვიტამინს, ასევე, ვითვალისწინებთ ექიმის მოთხოვნებს და რატომ გახდა ასე მიუღებელი, რომ დღეს დგას ყველაზე დიდი საშიშროება. ეს არ არის ყოველდღიური მოვლენა, რაც დღეს ხდება", — განაცხადა მეუფე საბამ სოფო ზურაბიანის პოლიტიკის ფორმულაში.

მეუფე საბას თქმით, მის ეპარქიაში ვირუსი ერთ-ერთ სტიქაროსანს დაუდგინდა და ამიტომ მოსაზრებებზე მრევლის დასწრება შეზღუდეს. მისივე თქმით, დღეს ყველაზე მთავარი მოწოდებაა – დარჩით სახლში და ამიტომ, მრევლმა სახლებიდან უნდა ილოცოს.

"დღეს თანამედროვე ტექნიკა გვაძლევს იმის საშუალებას, რომ გვქონდეს ლაივი და მსახურება პირდაპირ ეთერში გადაეცეს. მრევლი გარკვეულწილად ამით ვანუგეშოთ და ჩაერთოს ლოცვაში, ხოლო ზიარებისთვის ჩვენ მივალთ სპეციალური აღჭურვილობით, როგორიც იქნება ექიმების რჩევა და სახლებში ვაზიარებთ, შევუსრულებთ სხვადასხვა ლოცვას", — განაცხადა მეუფე საბამ.

მეუფე საბას გადაწყვეტილებით, ჩრდილოეთ ამერიკის ქართულ ეპარქიაში წირვა-ლოცვა მრევლის გარეშე ჩატარდება. მისი თქმით, ეპარქია ითვალისწინებს სახელმწიფოს რეგულაციებს, რათა კორონავირუსი უფრო მეტად არ გავრცელდეს.

20 მარტს,სინოდის სხდომის დასრულების შემდეგ მეუფე ნიკოლოზმა განაცხადა, რომ კორონავირუსის პანდემიის მიუხედავად, ზიარების წესზე ეკლესია იმავე აზრზე დარჩა.

"მე პირადად ასე მიმაჩნია და წმინდა სინოდში არავითარი აზრთა სხვადასხვაობა არ არის, რომ ეჭვის შეტანა იმაში, რომ საერთო კოვზით ზიარებით შეიძლება ინფექცია გადაედოს ვინმეს, ეს არის ყოვლად გამორიცხული. შესაბამისად, ამას რაც შეეხება არავითარი ცვლილება არ შეიძლება, რომ იყოს", — განაცხადა მან.

მიტროპოლიტი ამტკიცებს, რომ ისინი ითვალისწინებენ ჯანდაცვის სამინისტროს რეკომენდაციებს და მრევლსაც ამისკენ მოუწოდებენ. თუმცა, ამავე დროს, აცხადებს, რომ აღდგომაზე სადღესასწაულო წირვა ჩატარდება.

საგანგებო მდგომარეობის მიუხედავად 22 მარტის საკვირაო წირვა სამების ტაძარში შეუფერხებლად გაიმართა. წირვას დაესწრო კათოლიკოს პატრიარქი ილია მეორეც. ტაძარში შეკრებილ მრევლს პერიოდულად აფრთხილებდნენ, დაეცვათ დისტანცია, თუმცა მათი ნაწილი ამას ვერ ახერხებდა. ზოგიერთი მათგანი პირბადის გარეშე იყო მისული. წირვისას საერთო კოვზით ჩატარდა ზიარების რიტუალიც.

21 მარტს საგანგებო მდგომარეობაზე საუბრის დროს პრემიერ-მინისტრმა, გიორგი გახარიამ განაცხადა, რომ ათზე მეტი ადამიანის შეკრება იზღუდება.

საგანგებო მდგომარეობის გამოცხადების დროს, გიორგი გახარიამ განაცხადა, რომ ათზე მეტი ადამიანის შეკრება იკრძალებოდა. ჟურნალისტების კითხვაზე ეხებოდა თუ არა ეს ეკლესიაში შეკრებებს გახარიამ უპასუხა:

"შეკრების შეზღუდვა ეხება ყველას და ყველაფერს და ამის მიზანი გახლავთ ჩვენი მოქალაქეების ჯანმრთელობაზე ზრუნვა. საქართველოს მთავრობის ძირითადი ამოცანა გახლავთ ვიზრუნოთ ჩვენი მოქალაქეების ჯანმრთელობაზე მიუხედავად მათი რელიგიური მრწამსისა".