ადამიანის უფლებების სწავლებისა და მონიტორინგის ცენტრი (EMC) პროკურატურას და პარლამენტს მოუწოდებს მიიღონ ზომები აფგან მუხთარლის საქმის გამოძიებისთვის.

ორგანიზაცია ეხმაურება აზერბაიჯანელი ჟურნალისტის ინტერვიუს 19 მარტს, ტელეკომპანია ფორმულას ეთერში, სადაც მუხთარლიმ საქართველოდან მისი გატაცების საქმეში ქართველი სამართალდამცავების მონაწილეობისა და სავარაუდო კორუფციული გარიგების შესახებ ისაუბრა.

EMC-ის აზრით, ჟურნალისტის განცხადება გამოძიების მხრიდან ადეკვატურ სამართლებრივ შეფასებას მოითხოვს, რისთვისაც მნიშვნელოვანია თავად მუხთარლის დაუყოვნებლივ გამოკითხვა და მისი მონაწილეობით საგამოძიებო მოქმედებების ჩატარება.

"ამასთან, რამდენადაც იკვეთება, რომ აფგან მუხთარლის გატაცების შემთხვევა სახელმწიფო უსაფრთხოებისა და ეროვნული ინტერესების ხელყოფასა და მაღალი თანამდებობის პირების მხრიდან სავარაუდო კორუფციული გარიგებებს უკავშირდება, მნიშვნელოვანია საქართველოს პარლამენტმა უზრუნველყოს საგამოძიებო კომისიის შექმნა და საკითხის შესწავლა. მომხდარის არაეფექტური გამოძიება საფრთხეს უქმნის საქართველოს დემოკრატიის იმიჯს, რაც არაერთხელ აღინიშნა ადამიანის უფლებებზე მომუშავე ადგილობრივი აქტორებისა და საერთაშორისო პარტნიორების მიერ", - ამბობენ ორგანიზაციაში.

საქმის ობიექტურად გამოძიების, აფგან მუხთარლის გამოკითხვისა და საგამოძიებო ექსპერიმენტის ჩატარების გარდა, EMC პროკურატურას მოუწოდებს, ჟურნალისტი და მისი ცოლი, ლეილა მუსტაფაევა დაზარალებულად ცნონ.

ორგანიზაცია მიმართავს საქართველოს პარლამენტის წევრებსაც, მათ შორის, დამოუკიდებელ დეპუტატებს, შეიქმნას დამოუკიდებელი საგამოძიებო კომისია და დაიწყოს საკითხის შესწავლა.

აზერბაიჯანელი გამომძიებელი ჟურნალისტი და აქტივისტი, გატაცებიდან თითქმის სამი წლის შემდეგ, თავისუფალია. მან აზერბაიჯანის ციხე 17 მარტს დატოვა და ოჯახთან ერთად გერმანიაში გაემგზავრა. 19 მარტს კი ტელეკომპანია ფორმულას ეთერში თბილისიდან მისი გატაცების დეტალებზე ისაუბრა. ჟურნალისტის ინფორმაციით, აზერბაიჯანელმა მაღალჩინოსანმა უთხრა, რომ მის გატაცებისთვის ქართულ მხარეს სამი მილიონი დოლარი მისცეს.

მუხთარლი დარწმუნებულია, რომ მის გატაცებაში საქართველოს სახელმწიფო უწყებები და მაღალჩინოსნები იყვნენ ჩართული. როგორც ის ჰყვება, თბილისში გატაცების დროს სამი ადამიანი დაესხა თავს, რომელთაც ქართული კრიმინალური პოლიციის ფორმები ეცვათ, აზერბაიჯანის საზღვარზე კი პასპორტის გარეშე შეუშვეს.

"ეს დაუშვა სასაზღვრო პუნქტმა, სასაზღვრო პუნქტის ხელმძღვანელმა. ამის შესახებ იცოდა სასაზღვრო ჯარმა, სასაზღვრო სამსახურმა, უშიშროების სამსახურმა და საქართველოს რესპუბლიკის კრიმინალურმა სამსახურმა. ეს მაღალ დონეზე იყო შეთანხმებული, მინიმუმ გიორგი კვირიკაშვილმა იცოდა", - თქვა მუხთარლიმ.

აზერბაიჯანელმა ჟურნალისტმა ინტერვიუში აღნიშნა ისიც, რომ საქართველოში აპირებს ჩამოსვლას და მოითხოვს გამოძიების დაწყებას.

"მხოლოდ მზად კი არა ვარ, მოვითხოვ, რომ ჩვენება ჩამომართვან. მინდა, ვაჩვენო ის ადგილები, საიდანაც გამიტაცეს, სადაც თავიდან ტომარა მომხსნეს, რა გზით წამიყვანეს — ყველაფრის ჩვენება შემიძლია", - თქვა მან.

აფგან მუხთარლი თბილისიდან 2017 წლის 29 მაისს გაუჩინარდა, მეორე დღეს კი ბაქოს ციხეში აღმოჩნდა. მისი თქმით, საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხთარლი საზღვრის უკანონო კვეთის გამო დააკავეს.

რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ ჟურნალიტის დაკავება აზერბაიჯან-საქართველოს სპეცსამსახურების წარმატებული ოპერაცია იყო.

აფგან მუხთარლის საქმეს ამ ეტაპზე ადამიანის უფლებათა ევროპული სასამართლო განიხილავს.

ამავე თემაზე: