პარლამენტის ყოფილი თავმჯდომარე და უმრავლესობის წევრი, ირაკლი კობახიძე ამბობს, რომ ოპოზიცია საარჩევნო სისტემაზე მოლაპარაკებების დროს "პოლიტიკური პატიმრების" გვარებს მუდმივად ასახელებდნენ. ამ თემაზე ირაკლი კობახიძემ იმედის ეთერში ისაუბრა.

"ბუნებრივია გვარებს გარეთაც და შიგნითაც მუდმივად ახსენებდნენ ოპოზიციონერები, მაგრამ ჩვენი პასუხი იყო მკაფიო, რომ ეს ვერ გახდება პოლიტიკური შეთანხმების საგანი. გამომდინარე იქიდან, რომ ამასთან დაკავშირებით გადაწყვეტილებას იღებს პროკურატურა, რომელთან მიმართებაშიც არავითარი ბერკეტი არ აქვს ხელისუფლებას და მეორე ესაა სასამართლო, რომელიც ასევე არის დამოუკიდებელი", — თქვა ირაკლი კობახიძემ.

კობახიძის თქმით, შეთანხმება ვინმეს გათავისუფლებაზე ვერც ზეპირად და ვერც წერილობით ვერ გაფორმდებოდა. მისივე განმარტებით, ქართული ოცნება ვერ გასცემდა უგულავას საქმესთან დაკავშირებით დაპირებას პრეზიდენტის ნაცვლად.

ოპოზიცია აცხადებს, რომ მოლაპარაკებების დროს ქართულ ოცნებასთან მათი აზრით პოლიტიკური პატიმრების საკითხიც განიხილეს და შეათანხმეს. ამ ფაქტს ხელისუფლება უარყოფს და ამბობს, რომ დოკუმენტში კონკრეტული გვარები ვერ ჩაიწერებოდა.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

გაიგეთ მეტი: