პატრიოტთა ალიანსის წევრის, ემზარ კვიციანის აზრით,არჩევნებიც დისტანციურ სისტემაზე გადავიდეს. ამის შესახებ მან პარლამენტის პლენარულ სხდომაზე დისტანციურ რეჟიმზე გადასვლაზე მსჯელობისას განაცხადა.

კვიციანმა, ასევე, გამოთქვა აზრი, რომ პარლამენტის რიგგარეშე სხდომებიც დისტანციურად უნდა ჩატრდეს.

"პატარა აზრი გამიჩნდა, საკანონმდებლო ორგანოში დისტანციური სხდომები არა მარტო საგანგებო სიტუაციების დროს, არამედ რიგგარეშე სხდომების დროსაც შეიძლება ჩატარდეს. ძალიან ხშირ შემთხვევაში, როდესაც რიგგარეშე სხდომა ტარდება, ხალხი ქალაქიდან გასულია. იდეა ძალიან მომწონს და ვფიქრობ, რომ გაამართლებს. ვფიქრობ, დღევანდელი ტექნოლოგიური საშუალებებით არაფერი გასაჭირი არ იქნება, რათა ეს გაკეთდეს. არჩევნებსაც თუ გადავიტანთ ამ სისტემაზე, იქნება ძალიან კარგი", — განაცხადა კვიციანმა.

საქართველოს პარლამენტში დაჩქარებული წესით განიხილავენ რეგლამენტის პროექტს, რომლის თანახმადაც, საქართველოს პრეზიდენტის მიერ საგანგებო ან საომარი მდგომარეობის გამოცხადებისას, ობიექტური გარემოების არსებობისას, როდესაც შეუძლებელია პარლამენტის სასახლის გამართული მუშაობა, პარლამენტის თავმჯდომარის გადაწყვეტილებით, პარლამენტის საქმიანობა შეიძლება წარიმართოს დისტანციურად, სათანადო ელექტრონული საკომუნიკაციო საშუალებების გამოყენებით.