სამოქალაქო ავიაციის სააგენტოს ინფორმაციით, მათ მიერ გაცემულ ავიასპეციალისტის მოქმედ მოწმობას საქართველოში 100 ქალი ფლობს. მათ შორის არიან: 5 მფრინავი, 9 ავიამეთვალყურე და 86 ბორტგამყოლი. მათივე ინფორმაციით, სამოქალაქო ავიაციის სააგენტოში ფრენის უსაფრთხოების 34 ინსპექტორს შორის 9 ქალია.

მათივე ცნობით, ავიასპეციალისტების რიცხვი ყოველწლიურად იზრდება და შარშან ავიასპეციალისტის მოქმედ მოწმობას 83 ქალი ფლობდა. თუმცა, ისეთ ტექნიკურ დარგში, როგორიც ავიაციაა ქალების საერთო რაოდენობა, როგორც საქართველოში, ისე მთელს მსოფლიოში ძალიან მცირეა.

სამოქალაქო ავიაციის საერთაშორისო ორგანიზაციის (ICAO) მონაცემებით, მსოფლიო მასშტაბით ქალი მფრინავების წილობრივი რაოდენობა მფრინავების საერთო რაოდენობის დაახლოებით 5%-ია. კიდევ უფრო ნაკლებია საინჟინრო-ტექნიკური მიმართულებით დასაქმებული ქალების რაოდენობა. ყველაზე მეტი ქალი, დაახლოებით 79% კი ბორტგამყოლად მუშაობს. ICAO-ს პროგნოზებით, 2034 წლისთვის, მსოფლიოში საჰაერო მიმოსვლის გაორმაგებაა მოსალოდნელი.

ავიასპეციალისტების დეფიციტურობის გათვალისწინებით, ICAO მოუწოდებს ქვეყნებს და საავიაციო ინდუსტრიას ხელი შეუწყონ გენდერული თანასწორობის განმტკიცებას, ქალთა თანასწორუფლებიან ჩართულობას და შესაძლებლობების რეალიზაციას საავიაციო სექტორში.

ორგანიზაცია საავიაციო სასწავლო დაწესებულებებს, ავიასაწარმოებსა და საავიაციო ხელისუფლებებს ასევე მოუწოდებს აწარმოონ შემეცნების ასამაღლებელი კამპანიები ქალებში ავიაციისა და STEM (მეცნიერება, ტექნოლოგიები, საინჟინრო საქმე, მათემატიკა) განათლების პოპულარიზაციის მიზნით.