საპარალამენტო უმრავლესობის წევრის, ნუკრი ქანთარიას აზრით, საქართველოში არსებულ ვითარებაზე საუბრისას კონგრესმენ ადამ კინზინგერის "მუქარა" ჟურნალისტის "ჩაკირკიტების" შედეგი იყო.

მისი თქმით, კინზინგერი არც ადმინისტრაციის ხელმძღვანელია და არც პრეზიდენტი და ის, რაც თქვა, მისი პირადი განცდებია.

"რა თქმა უნდა, კონტექსტიდან ამოგდებული ასეთი ფრაზა ათასგვარ არასასურველ ვერსიებს იწვევს. ვინც მთლიანი ინტერვიუ წაიკითხა, იქ ჩანს, რომ მას აქვს გამოკვეთილი მიზანი, რომ მოხდეს აქ მშვიდობიანი შეთანხმება. აქეთკენ მიდის ის და მაქსიმალურად ცდილობს, რომ აქ სიტყვები არ დაიშუროს. სხვათაშორის, ოპოზიციასაც ძალიან მკვეთრად ეუბნება, რაც ადრე არ იყო და უკვე ეს არის კარგი ნიშანი. ვფიქრობ, ეს კარგი ნიშანი, რომ ის უფრო ობიექტურად და რეალურ ინფორმაციაზე დაყრდნობით აკეთებს გარკვეულ მსჯელობებს", — განაცხადა ქანთარიამ პალიტრანიუსის ეთერში.

აშშ-ს კონგრესის წევრის, ადამ კინზინგერის თქმით, პროპორციული საარჩევნო სისტემის გარშემო შეუთანხმებლობის შემთხვევაში "ის, რასაც გააკეთებენ, ბევრისთვის მოულოდნელი იქნება". ამის შესახებ მან ამერიკის ხმასთან ინტერვიუში განაცხადა. მისივე განცხადებით, მნიშვნელოვანია, რომ მხარეებმა გამოსავალი იპოვონ:

"ვფიქრობ, ის რასაც გავაკეთებთ, ბევრისთვის მოულოდნელი იქნება. ამას აქ [შეერთებულ შტატებში] გადავწყვეტთ. მე ვიტოვებ იმედს, რომ გამოსავალი მიღწეული იქნება დაკავებების, დაკავებების მუქარის და იმის თაობაზე, თუ როგორი იქნება საარჩევნო სისტემა 2020 წელს. 2024 წელს სრულიად პროპორციული არჩევნების გარანტია იქნა გაცემული. ჩვენ ვნახავთ, რისი გაკეთება შეგვიძლია. ვგეგმავ, საქართველოში დაბრუნებას. თუმცა, საბოლოოდ ჩვენს ნაბიჯებზე უფრო მნიშვნელოვანი იქნება ის, თუ რა მოხდება საქართველოში, და ეს ქართველმა ხალხმა უნდა გადაწყვიტოს დემოკრატიულად".

შეწყვეტილი დიალოგი და საარჩევნო სისტემა

მას შემდეგ, რაც ბიძინა ივანიშვილმა დაპირება არ შეასრულა და 2020 წლის საპარლამენტო არჩევნებისთვის პროპორციულ საარჩევნო სისტემაზე გადასვლას უმრავლესობის წევრებმა მხარი არ დაუჭირეს, ოპოზიციასა და მმართველ გუნდს შორის დიპლომატების მედიატორობით დაიწყო. სადაც მმართველმა გუნდი ოპოზიციას პროპორციული მანდატების 100-მდე გაზრდას და მაჟორიტარულის 50-მდე შემცირებას სთავაზობდა.

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემდეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდგომ მოლაპარაკებას აზრი არ აქვს, თუ მმართველი გუნდი პოლიტპატიმრებს არ გაათავისუფლებს და ისეთ საარჩევნო მექანიზმს არ დათანხმდება, რომელიც 40%-ზე ნაკლები მხარდაჭერის მქონე პარტიას არ მთავრობის დაკომპლექტების საშუალებას არ მისცემს. ოცნების დეპუტატებმა უგულავას პატიმრობა "ადეკვატურ განაჩენად შეაფასეს".

ამ ეტაპზე ოპოზიცია და მმართველი გუნდი დიალოგს დიპლომატიურ კორპუსთან ერთად არაოფიციალურ შეხვედრებზე აგრძელებს. ოპოზიციის განცხადებით, ერთადერთი თანაფარდობა, რომელიც უზრუნველყოფს წარმომადგენლობის პროპორციულობას არის 130/20-ზე, თუმცა ისინი პოლიტპატიმრების გათავისუფლების გარეშე ოცნებასთან შეთანხმებაზე უარს ამბობენ.

ქართულ ოცნებაში განაცხადეს, რომ 40%-იან ბარიერზე თანახმა არიან, რადგან 50%-ზე ნაკლების აღებას არ აპირებენ. საპასუხოდ მათ ოპოზიციას 110/40-ზე ფოტმატი შესთავაზეს, თუმცა დაკავებულ ოპოზოციონერებს ისინი პოლიტპატიმრებად არ მიიჩნევენ.