თეა წულუკიანმა ოცნების პარლამენტის პლენარულ სხდომაზე სახალხო დამცველს, ლევან იოსელიანს მიმართა, რომ მას ქართული ოცნების წარმომადგენლების და მათი ოჯახის წევრების უფლებების დაცვა “რცხვენია”.

"ადამიანებს შარშან აუკრძალეს მიმოსვლის უფლება, რომელიც საერთოდ არ არის პოლიტიკაში ჩართული და არიან პოლიტიკოსის ოჯახის წევრები. ეს არის კონსტიტუციური და კონვენციური ადამიანის უფლება — იმიტომ, რომ შენი ქმარი, ცოლი მეზობელი თუ ვიღაცა არის ჩართული ქართული ოცნების მხარეს, იმას გადაადგილების უფლებას უზღუდავენ. ეს არ არის თქვენი საქმე?

თქვენ მაშინ უნდა მოგეწოდებინათ საქართველოს მთავრობისთვის, რომ შეიტანე სტრასბურგის სასამართლოში ბრიტანეთის წინააღმდეგ სახელმწიფოთაშორისი საჩივარი. აი, ეს არის თქვენი საქმე. [...] იცავდეთ ხმალამოღებული ყველას განურჩევლად და თქვენ ყველას ხმალამოღებით განურჩევლად არ იცავთ. იმიტომ, რომ ჩვენი არსებობის გრცხვენიათ. [...] თქვენ გრცხვენიათ ჩვენი დაცვა.

შარშან, საანგარიშო პერიოდში, საკუთრების უფლების და მიმოსვლის თავისუფლების მასობრივი დარღვევები დეპუტატებზე იყო, მათ ოჯახის წევრებზე საკუთრების უფლებები დაირღვა, აღარაფერს ვამბობ ბიძინა ივანიშვილზე, მაგრამ თქვენ გრცხვენიათ ამაზე ლაპარაკი. [...] თქვენ მოუწოდეთ ვინმეს რამისკენ, რომ ეს არ ვარგა? მე ჩემსას გეტყვით..." — თქვა წულუკიანმა

შემდეგ ლევან იოსელიანმა თეა წულუკიანს უპასუხა — "არა ისეთ რაღაცას მეუბნებით, აშკარა სხვადასხვა წარმოდგენები გვაქვს ადამიანის უფლებებზე", რაზეც ოცნების პარლამენტის თავმჯდომარემ სახალხო დამცველს მიმართა, რომ ის მისგან განსხვავებით ადამიანის უფლებების სპეციალისტია.

"მე ადამიანის უფლებების სპეციალისტი ვარ თქვენგან განსხვავებით. [...] თქვენ დაიჯერეთ როგორმე რაც არ უნდა გირჩიონ ლომჯარიას კადრებმა, რომ საქართველოს ტერიტორიაზე მყოფი ნებისმიერი ადამიანის უფლების დარღვევა გეხებათ, განურჩევლად იმისა ვინ არღვევს ამ უფლებას," — თქვა წულუკიანმა.

ცნობისთვის, სახალხო დამცველმა, ლევან იოსელიანმა პარლამენტის პლენარულ სხდომაზე ანგარიში წარადგინა და ვრცლად ისაუბრა 2024 წელს საპროტესტო აქციებზე გამოვლენილ დარღვევებთან დაკავშირებით.