ევროპის საბჭოს საპარლამენტო ასამბლეის(PACE) იმ მომხსენებლებმა, რომლებიც საქართველოს ამონიტორინგებენ (ედიტე ესტრელა - პორტუგალია, SOC და საბინა ჩუდიჩი - ბოსნია და ჰერცეგოვინა, ALDE) სერიოზული შეშფოთება გამოხატეს ქვეყანაში პოლიტიკური ოპოზიციის ზეწოლის გამო. მათი კრიტიკა შეეხება ხელისუფლების მხრიდან შემზღუდავი კანონების შემოღებას და სამართლებრივი ინსტრუმენტების ბოროტად გამოყენებას ოპოზიციის წევრების, ჟურნალისტებისა და სამოქალაქო საზოგადოების აქტივისტების საწინააღმდეგოდ.

თანამომხსენებლებმა გამოხატეს თავიანთი წუხილი, სასამართლოში იმ ჟურნალისტებისა და პოლიტიკური აქტივისტების გამოძახებასთან მიმართებითაც, რომლებიც "შეურაცხყოფას აყენებენ" ხელისუფლების წარმომადგენლებს სოციალურ მედიაში და მიიჩნევენ, რომ აღნიშნული სამართლებრივი სასჯელი დაუსაბუთებელი და არაპროპორციულია. ასევე, ოპოზიციის ზეწოლად შეფასდა იმ ოპოზიციური პარტიების წევრების დაკავება, რომლებმაც უარი თქვეს პარლამენტის საგამოძიებო კომისიის წინაშე წარდგომაზე.

“ეს მიმდინარე დარბევა მხოლოდ ამძაფრებს სოციალურ და პოლიტიკურ კრიზისს საქართველოში და აშორებს ქვეყანას ევროსაბჭოს წევრის ვალდებულებების შესრულებას.”

”ჩვენ მოვუწოდებთ ხელისუფლებას, შეწყვიტოს ეს არადემოკრატიული დარბევა განსხვავებული ხმების მიმართ ქართულ საზოგადოებაში და ქვეყანაში დემოკრატიული წინსვლა დააბრუნოს.”

“ჩვენ ვაგრძელებთ მზადყოფნას შევინარჩუნოთ ღია და კონსტრუქციული დიალოგი ხელისუფლებასთან და ყველა პოლიტიკურ ძალასთან, რათა დავეხმაროთ ქვეყანას ევროპის საბჭოს წინაშე ნაკისრი ვალდებულებების შესრულებაში.”

საქართველო ერთ-ერთია ევროპის საბჭოს ათ ქვეყანას შორის, რომელსაც სრული მონიტორინგი უტარდება. ეს ნიშნავს, რომ ორი წარმომადგენელი (ე.წ. მომხსენებლები) რეგულარულად სტუმრობს ქვეყანას, ესაუბრება ხელისუფლების წარმომადგენლებს და მონაწილეობს შეხვედრებში, რათა შეამოწმონ რამდენად კარგად მუშაობს ქვეყანა და რა პრობლემები შეიძლება ჰქონდეს მას.