აშშ-ს ელჩის მოადგილის რეზიდენციაში ოპოზიციის ლიდერების, დიპლომატებისა და ხელისუფლების წარმომადგენლების შეხვედრა გაიმართა. ღონისძიების გამართვის შესახებ მედიისთვის ცნობილი არ იყო. მთავარი არხის მიერ გავრცელებულ კადრებში ჩანს, რომ შეხვედრაზე შევიდნენ გერმანიისა და ევროკავშირის ელჩები. მათივე ცნობით, შეხვედრა ჯერ არ დაუტოვებია პარლამენტის სპიკერს, არჩილ თალაკვაძეს.

შენობის დატოვების შემდეგ ოპოზიციონერებმა თქვეს, რომ შეხვედრის ორგანიზატორი აშშ-ს ელჩის მოადგილე იყო. ევროპული საქართველოს ლიდერმა გიგა ბოკერიამ ჟურნალისტებს უთხრა, რომ ეს იყო "მეგობრული სადილი". დამოუკიდებელი დეპუტატის, თამარ ჩუგოშვილის თქმით კი შეხვედრაზე ზოგადი საკითხები განიხილეს:

"ეს იყო დიპლომატების მხრიდან გამართული მეგობრული ვახშამი, ყოველგვარი შეთანხმებების გარეშე".

შეხვედრა დატოვა ნინო ბურჯანაძემაც, რომელმაც განაცხადა, რომ ეს არ იყო მოლაპარაკებების რაუნდი:

"ელჩმა მოგვიპატიჟა დღეს იმისათვის, რომ ჩვენს მეგობრებს თავიანთი მოსაზრებები გაეზიარებინათ ჩვენთვის. როდესაც ჩვენს მეგობარ ქვეყნებს სურთ, რომ მათი მოსაზრებები მოვისმონოთ, ბუნებრივია, ეს მოპატიჟება მივიღეთ. ჩვენ დავინახეთ ჩვენი მეგობრების დაინტერესება, რომ ქვეყანა პოლიტიკური კრიზისიდან გამოვიდეს".

ნაციონალური მოძრაობის ლიდერის, გრიგოლ ვაშაძის თქმით, საუბარი იყო პოლიტიკურ თემებზე:

"არავითარი შეთავაზებები არ გაკეთებულა. არავითარი შეთავაზებები არ მიგვიღია, არავითარი შეთანხმებები არ ყოფილა. კონკრეტული საკითხები არ წამოჭრილა".

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".