სტატისტიკის ეროვნული სამსახურის ცნობით, წლიური ინფლაციის დონემ 6,4 პროცენტი შეადგინა. უწყების ცნობით, წლიური ინფლაციის ფორმირებაზე ძირითადი გავლენა იქონია სურსათსა და უალკოჰოლო სასმელებზე ფასების ცვლილებამ. სურსათი და უალკოჰოლო სასმელების ჯგუფში ფასები გაიზარდა 12,7 პროცენტით, რაც წლიურ ინფლაციაზე 3,95 პროცენტული პუნქტით აისახა.

ფოტო: საქსტატი

ფასები მომატებულია შემდეგ ქვეჯგუფებზე: ხილი და ყურძენი (25 პროცენტი), რძე, ყველი და კვერცხი (19 პროცენტი), ხორცი და ხორცის პროდუქტები (15 პროცენტი), შაქარი, ჯემი და სხვა ტკბილეული (11 პროცენტი), ბოსტნეული და ბაღჩეული (11 პროცენტი), თევზეული (10 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (8,7 პროცენტი), ზეთი და ცხიმი (7,4 პროცენტი), პური და პურპროდუქტები (5,6 პროცენტი), ყავა, ჩაი და კაკაო (5 პროცენტი).

ბოლო ერთ წელში ფასები 8,7 პროცენტით გაიზარდა სასტუმროებში, კაფეებსა და რესტორნებში, შესაბამისად, ჯგუფის წვლილმა წლიურ ინდექსში 0,39 პროცენტი შეადგინა. ფასების ზრდა დაფიქსირდა როგორც საზოგადოებრივ კვებაზე (9,5 პროცენტი), ისე ღამის გასათევ მომსახურებაზე (1,3 პროცენტი).

საბაზო ინფლაციის მაჩვენებელმა 2020 წლის თებერვალში გასული წლის თებერვალთან შედარებით 4,6 პროცენტი შეადგინა, ხოლო თამბაქოს გარეშე წლიური საბაზო ინფლაციის 2 მაჩვენებელი 3,8 პროცენტი იყო.