სასექსის ჰერცოგმა და ჰერცოგინიამ 2020 წლის გაზაფხულიდან SussexRoyal-ის ბრენდის გამოყენება უნდა შეწყვიტონ. ინფორმაცია ამის შესახებ მას შემდეგ გავრცელდა, რაც ცნობილი გახდა, რომ ჰარისა და მეგანს სამეფო ვალდებულებები 31 მარტს შეუწყდებათ და ამის შემდეგ ისინი ოფიციალურად ჩამოშორდებიან დიდი ბრიტანეთის სამეფო ოჯახს.

წყვილის წარმომადგენელმა განაცხადა, რომ კანონებიდან გამომდინარე, რომელიც სიტყვა "სამეფოს" გამოყენებას უკავშირდება, ისინი ახალ არასამთავრობო ორგანიზაციას Sussex Royal Foundation-ს (სასექსის სამეფო ფონდს) ვერ დაარქმევენ. ამასთანავეგანაცხადი Sussex Royal-ის გამოყენებაზე, ასევე, უარყვეს.

წყვილმა Sussex Royal-ის ბრენდული ნიშანი გასული წლის ივნისში შეიძინა და ამ სახელს იყენებს საიტზეც და სოციალურ მედიაშიც. მეგანი და ჰარი აპირებენ, რომ საქველმოქმედო ორგანიზაციის ჩამოყალიბებით დაეხმარონ საზოგადოებას, გააძლიერონ ახალგაზრდები, ქალები, ცნობიერება აამაღლონ შიდსზე, კონსერვაციაზე და ფსიქიკურ ჯანმრთელობაზე.

2020 წლის დასაწყისში ჰარიმ და მეგანმა განაცხადეს, რომ სამეფო ვალდებულებებს ჩამოშორდებოდნენ და საკუთარი ფინანსური დამოუკიდებლობისთვის იმუშავებდნენ. წყვილი სხვადასხვა შეხვედრებისთვის დიდ ბრიტანეთში თებერვლის ბოლოს ბრუნდება.

მეგანი და ჰარი აპირებენ, რომ დრო ჩრდილოეთ ამერიკასა და გაერთიანებულ სამეფოში გაატარონ. წყვილის წარმომადგენელი აცხადებს, რომ ისინი ინგლისში რეგულარულად ჩავლენ. მათი უახლოესი გეგმები დიდ ბრიტანეთში თებერვალსა და მარტში გამართულ ექვს ღონისძიებას უკავშირდება.

წყვილი ოფიციალურად შეინარჩუნებს "მისი სამეფო უმაღლესობის" [HRH] წოდებას, თუმცა მას არ გამოიყენებს.