გენერალური პროკურორობის კანდიდატი, ირაკლი შოთაძე იურიდიულ საკითხთა კომიტეტის სხდომაზე ოპოზიციის პერფორმანსი აკაკი წერეთლის პოემა გამზრდელის სიტყვებით გამოეხმაურა:

"მხოლოდ აღზრდა ადამიანს რას უშველის, თუ ბუნებამც არ უშველაო, ნათქვამია", — აღნიშნა შოთაძემ.

აკაკი წერეთლის პოემაში აღნიშნული ფრაზა ასე ჟღერს: "მაგრამ მარტო წვრთნა რას იზამს, თუ ბუნებამც არ უშველა".

დღეს, იურიდიულ საკითხთა კომიტეტი შოთაძის კანდიდატურას განიხილავს. სხდომის დაწყებისას დარბაზში ევროპული საქართველოს დეპუტატი ელენე ხოშტარია და ნაციონალური მოძრაობის დეპუტატი თინა ბოკუჩავა მივიდნენ. მათ ბიძინა ივანიშვილის გამოსახულებით ნიღბები ეკეთათ და ირაკლი შოთაძეს "ბიძინა ივანიშვილის მონას" ეძახდნენ.

"ძალიან სამწუხაროა ის გარემოება, რომ ამ ყველაფრის მომწყობებს საშუალება ჰქონდათ კითხვები დაესვათ, მოესმინათ ხედვები, მოესმინათ მოსაზრებები და შემდგომ გამოეხატათ თავიანთი კრიტიკული მოსაზრება. მაგრამ რეალობა ისაა, რომ ამ ხალხს ეს არ აინტერესებს. თუ ისინი ფიქრობენ, რომ ამ ყველაფრით მე დავრჩი შეურაცხყოფილი ძალიან ცდებიან. უპირველეს ყოვლისა, მსგავსი ქმედებებით მსგავსი ქმედებების ჩამდენი ადამიანები რჩებიან შეურაცხყოფილი", — განაცხადა შოთაძემ.