ევროპარლამენტში პოლიტიკური გაერთიანება Renew Europe ევროპული საქართველოს ლიდერის, გიგი უგულავას დაპატიმრებას გმობს. ისინი აცხადებენ, რომ საქართველოს ხელისუფლებამ უნდა შეწყვიტოს პოლიტიკური ოპონენტების გასაჩუმებლად სასამართლო სისტემის ბოროტად გამოყენება.

"ეს ეწინააღმდეგება საქართველოს მიერ ასოცირების შეთანხმებით ნაკისრ ვალდებულებას, რომელიც სასამართლოს დამოუკიდებლობის უზრუნველყოფასა და კანონის უზენაესობის დაცვას ეხება", — ნათქვამია Renew Europe-ს განცხადებაში.

Renew Europe ჯგუფის ლიეტუველი ევროპარლამენტარი, პეტრას აუსტრევიჩუსი მოუწოდებს ქართულ ოცნებასა და მის დამფუძნებელს, ბიძინა ივანიშვილს, რომ გამოიჩინოს კეთილი ნება და ღიაობა და სრულად ჩაერთოს ოპოზიციასთან პოლიტიკურ დიალოგში.

ამავე გაერთიანების კიდევ ერთი რუმინელი ევროპარლამენტარი, რამონა სტრუგარიუსი ამბობს, რომ არ შეიძლება ოპოზიციას გაჩუმება აიძულო, ხოლო საარჩევნო სისტემასთან დაკავშირებული რეფორმა დიალოგის გზით უნდა გატარდეს.

"შემაშფოთებელია, რომ პოლიტიკური მოღვაწე შეიძლება საქართველოში დააკავო, რადგან საქართველო არა დიქტატურა, არამედ დემოკრატიაა, მეგობარია, რომელსაც გვსურს მხარი დავუჭიროთ. ნუ დაგვაკარგინებთ თქვენს იმედს", — აცხადებს ფრანგი ევროპარლამენტარი ბერნარდ გეტა.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".