RIA Novosti-ის ცნობით, რუსეთის საგარეო საქმეთა სამინისტრო აცხადებს, რომ ევროკავშირის მიერ სანქციების მე-17 და მე-18 პაკეტების საპასუხოდ, რუსეთი კიევისთვის სამხედრო დახმარების გაწევაზე პასუხისმგებელ პირებს ქვეყანაში შესვლას უკრძალავს.

"რუსულმა მხარემ მნიშვნელოვნად გააფართოვა ევროპული ინსტიტუტების, ევროკავშირის წევრი სახელმწიფოების და ბრიუსელის ანტირუსულ პოლიტიკაში ინტეგრირებული რიგი ევროპული სახელმწიფოების წარმომადგენლების სია. [...] ჩვენი სახელმწიფოს ტერიტორიაზე შესვლა აკრძალულია," — ნათქვამია რუსეთის საგარეო უწყების განცხადებაში.

საუბარია სამართალდამცავი ორგანოების, სამთავრობო და კომერციული ორგანიზაციების თანამშრომლებზე, ევროკავშირის ქვეყნებისა და სხვა დასავლეთის ქვეყნების მოქალაქეებზე, რომლებიც უკრაინას დაეხმარნენ.

გარდა ამისა, რუსული მედიის ცნობით, შესვლა აეკრძალებათ, უკრაინაში ორმაგი დანიშნულების პროდუქციის მიწოდების ორგანიზების მონაწილეებს, ასევე პირებს, რომლებიც ჩართულნი არიან რუსეთის ტერიტორიული მთლიანობის შელახვისკენ მიმართულ საქმიანობაში და ბალტიის ზღვაში გემებისა და ტვირთების გადაადგილების ბლოკადის ორგანიზებაში.

რუსეთში შესვლას ვეღარ შეძლებენ ევროპული სტრუქტურების, ევროკავშირის ქვეყნების სამთავრობო ორგანოებისა და სხვა ევროპული სახელმწიფოების წარმომადგენლები, რომლებიც სავარაუდოდ, "უკრაინული ტერიტორიებიდან ადამიანების უკანონო დაპატიმრებებისა და გაძევების" საბაბით მონაწილეობენ რუსი ჩინოვნიკების დევნაში.

ცნობისთვის, ევროკავშირის ახალი სანქციები 22 რუსულ ბანკთან ტრანზაქციების აკრძალვას ითვალისწინებს, მათ შორის T-Bank-თან, Yandex Bank-თან, Ozon Bank-თან, რუსეთის პირდაპირი ინვესტიციების ფონდთან და მის შვილობილ კომპანიებთან. ასევე, EU შემოიღებს ნავთობის ფასის ზღვრის შეცვლის ავტომატურ მექანიზმს. Reuters-ის ინფორმაციით, ეს შეზღუდვები რუსული ნავთობის ზღვრულ ფასს ბარელზე დაახლოებით 47,6 დოლარამდე შეამცირებს. ამასთან, სანქციების პაკეტი გულისხმობს რუსული ნედლეულისგან დამზადებული და სხვა ქვეყნებიდან იმპორტირებული ნავთობპროდუქტების იმპორტის აკრძალვას, გარდა კანადისა, ნორვეგიისა, შვეიცარიისა, დიდი ბრიტანეთისა და აშშ-ისა.

სანქციების პაკეტი ასევე გულისხმობს სრულ აკრძალვას "ნორდ სტრიმთან" დაკავშირებულ ოპერაციებზე. გაუქმდება ჩეხეთის რესპუბლიკისთვის რუსული საწვავის იმპორტის შეღავათები.

ცნობისთვის, ევროკავშირმა რუსეთის წინააღმდეგ სანქციების მე-18 პაკეტი 18 ივლისს შეათანხმა, რაც ბლოკის ერთ-ერთი ყველაზე მასშტაბური მცდელობაა, შეაფერხოს მოსკოვის შესაძლებლობა, გააგრძელოს ომი უკრაინის წინააღმდეგ.

ევროკავშირის საგარეო პოლიტიკის ხელმძღვანელმა კაია კალასმა X-ზე დაწერა, რომ სანქციების მე-18 პაკეტი "ერთ-ერთი ყველაზე ძლიერია", რომელიც კრემლს ომის ბიუჯეტს კიდევ უფრო შეუმცირებს.

ევროკომისიის პრეზიდენტმა ურსულა ფონ დერ ლაიენმა განაცხადა, რომ სანქციები "რუსეთის საომარი მანქანის გულს" უტევს.

ასევე იხილეთ: