პაციენტი, რომელიც გუშინ, 21 ივლისს ინგოროყვას კლინიკაში ექთანს თავს დაესხა, დააკავეს. ამის შესახებ ინფორმაციას შსს ადასტურებს. მათ ცნობით, ის ძალადობის, სისხლის სამართლის კოდექსის 126-ე მუხლითაა დაკავებული.

21 ივლისს, Palitra News-მა გაავრცელა ვიდეო, სადაც ჩანდა როგორ დაესხა ქალი ინგოროყვას კლინიკის სამედიცინო პერსონალს.

"37 წლის ქალბატონი იქნა შემოყვანილი გუშინ ჩვენთან კლინიკაში, უტარდებოდა შესაბამისი სამედიცინო გამოკვლევები, როდესაც მოულოდნელად თავს დაესხა ჩვენს ექთანს. საბედნიეროდ, ექთნის მდგომარეობა არ არის მძიმე, ზედაპირული დაზიანებები აქვს მიღებული. ჩვენი მხრიდან რეაგირება მოხდა უმალვე, ჩაერთო დაცვის სამსახური, გამოძახებული იქნა საპატრულო პოლიცია, აღნიშნული პიროვნება გადაყვანილი იქნა შესაბამისს საგამოძიებო ორგანოში, ჩვენი მხრიდან ყველა საჭირო ინფორმაცია გადაცემულია შესაბამისს ორგანოსთვის და ყველანაირად ვთანამშრომლობთ ჩვენი თანამშრომლების დაცვის მიზნით," — განუცხადა ინგოროყვას კლინიკის იურისტმა, თამარ როყვამ NEWS.On.ge-ს.