დღეს თბილისში ფარიკაობის მსოფლიო ჩემპიონატი იხსნება, სადაც ნეიტრალური სტატუსით და სრული შემადგენლობით არიან ჩამოსული რუსი მოფარიკავეები.

საქართველოს ფარიკაობის ფედერაციის პრეზიდენტი, მერაბ ბაზაძე ტელეკომპანია "ფორმულასთან" აცხადებს, რომ სპორტი პოლიტიკაში არ უნდა ჩაერიონ.

ჟურნალისტის კითხვაზე, რომ რუსი მოფარიკავეების ნაწილი, მაგალითად — კამილ იბრაგიმოვი, იანა ეგორიანი, სოფია ველიკაია უკრაინის წინააღმდეგ რუსეთის რიგებში იბრძიან და პუტინის უახლოესი გარემოცვის წევრები არიან, მერაბ ბაზაძე ამბობს, რომ სპორტი და პოლიტიკა უნდა გავმიჯნოთ.

"გთხოვთ, რომ პოლიტიკაში ნუ გამრევთ. მე ვარ სპორტული ფედერაციის პრეზიდენტი. აღნიშნული ღონისძიება დაგეგმარდა, ვალდებულება მოგვცა საერთაშორისო ფედერაციამ და საერთაშორისო ფედერაციის წესდებით მე ვალდებული ვარ, მივიღო მტერიც მოყვარეც, კარგი, ცუდიც.

ვთანხმდებით, რომ [რუსეთს] ოკუპირებული აქვს ჩვენი ტერიტორიები. ეს საერთაშორისო ფედერაციის პრეროგატივაა. ჩემი აზრი ისაა, რომ მე უნდა ვუმასპინძლო, სპორტი და პოლიტიკა უნდა გავმიჯნოთ. ვიცი, რომ სამხედრო წოდებები აქვთ, მაგრამ აღნიშნულ სპორტსმენებს ვიცნობ ძალიან ბევრი წელია. არიან ძალიან წარმატებული სპორტსმენები და ავტომატით ხელში ისინი არ მინახავს. ძალიან ცნობილი სპორტსმენები არიან.

სპორტი ვართ ჩვენ, პოლიტიკაში არ ვერევით და არ უნდა ჩავერიოთ. ჩვენ გვრევენ, ცდილობთ, რომ ჩაგვრიოთ, მაგრამ არ ჩავერევით", — ამბობს ბაზაძე.

საქართველოს ფარიკაობის ფედერაციის ცნობით, ჩემპიონატში 35 ქვეყნის და 1200-ზე მეტი სპორტსმენი იღებს მონაწილეობას.

თავად ტურნირი 9 დღეს გაგრძელდება და 30 ივლისს დაიხურება.