მკითხველებმა მედიაორგანიზაცია "ბათუმელები/ნეტგაზეთს" დავალიანების ძირი თანხა შეუგროვეს.

"დღეს, 22 ივლისს, "ბათუმელებმა" გადაიხადა 47 ათასი ლარი. სწორედ ამ ოდენობის დავალიანება — ძირი თანხა — ჰქონდა ორგანიზაციას ბიუჯეტის წინაშე. "ბათუმელებმა" ამ დავალიანების დაფარვა მოახერხა მკითხველის მხარდაჭერით. დიდი მადლობა მხარდაჭერისთვის", — წერს მედიაორგანიზაცია.

ამ ეტაპზე "ბათუმელებს" გადასახდელი დარჩა ძირ თანხაზე დარიცხული საურავი და ჯარიმა: საურავი 126 ათასი ლარი და ჯარიმა – 109 ათასი ლარი.

"ბათუმელები/ნეტგაზეთი აცხადებს, რომ ინკასო, როგორც ინსტრუმენტი ხელისუფლებამ გამოიყენა მზია ამაღლობელის განაჩენის ეტაპზე.

"მივიჩნევთ, რომ ინკასო და უახლეს მომავალში დაგეგმილი ყველა სხვა ოპერაცია მიმართულია მზია ამაღლობელის წინააღმდეგ, პერსპექტივაში კი მის მიერ შექმნილი მედიაორგანიზაციის გასანადგურებლად.

ამის მარტივი დადასტურებაა ერთი მაგალითი: შემოსავლების სამსახურის 2025 წლის 21 მაისის ოფიციალური ინფორმაციით, ტელეკომპანია „იმედის“ დავალიანება ბიუჯეტის წინაშე არის 17 მილიონი ლარი. "რუსთავი 2-ს" კი 25 მილიონი ლარი აქვს ბიუჯეტისთვის გადასახდელი.

"ბათუმელებს" სახელმწიფოს წინაშე არსებული დავალიანება აღიარებული ჰქონდა და ყოველთვიურად იხდიდა თანხას მის დასაფარად.

ინკასოს მუქარის შემდეგ, "ბათუმელებმა" შემოსავლების სამსახურს ოფიციალურად მიმართა და ითხოვა ვალის გადასახდელად ჩვენთვის შემოეთავაზებინათ გრაფიკი,"— ნათქვამია გავრცელებულ ინფორმაციაში.

როგორც მედიაორგანიზაცია წერს, შემოსავლების სამსახურმა თავდაპირველად უარი უთხრა ვალის გადასახდელად გრაფიკის შემოთავაზებაზე. დღეს კი შემოსავლების სამსახურმა გაავრცელა განცხადება, რომ ბათუმელებს დავალიანების გადასახდელად გრაფიკი შეუდგინოს.