საერთაშორისო გამჭვირვალობა საქართველო (TI) იმ საკანონმდებლო ცვლილებებზე აქვეყნებს ვრცელ პუბლიკაციას, რომლებიც ქვეყანაში 2025 წლის აპრილის შემდეგ განხორციელდა.

"ქართული ოცნება აგრძელებს ისეთი რეპრესიული კანონების მიღებას, რომელიც მიზნად ისახავს ადამიანის ძირითადი უფლებების შეზღუდვას, სამოქალაქო საზოგადოების გაუქმებას, საპარლამენტო ზედამხედველობის მოშლას და სახელმწიფო ინსტიტუტების სრულ პარტიულ დაქვემდებარებას", — წერს TI.

როგორც პუბლიკაციაში ვკითხულობთ, "სიტყვისა და გამოხატვის თავისუფლების შესახებ" კანონი გამოხატვის ჩახშობის იარაღად გადაიქცევა; ადმინისტრაციულ სამართალდარღვევათა კოდექსში ცვლილებები პროტესტის მონაწილეთა დაპატიმრების ახალი შესაძლებლობებს ქმნის; "საერთო სასამართლოების შესახებ" კანონში ცვლილებებით, ქართულმა ოცნებამ სასამართლო აქტების ხელმისაწვდომობა და მოსამართლეთა დამოუკიდებლობა შეიზღუდა; სისხლის სამართლის კოდექსში ცვლილებით შესაძლებელი იქნება მოწმის ვინაობა უცნობი დარჩეს; "გრანტების შესახებ კანონში" ცვლილებებით, მთავრობის ნებართვის გარეშე გრანტების გაცემა და მიღება აიკრძალა.

ამას გარდა, ქართულმა ოცნებამ სისხლის სამართლის კოდექსში ცვლილებები წარადგინა, რომლის თანახმად დაზარალებულს შესაძლებლობა ექნება ზიანი აინაზღაუროს როგორც დანაშაულის ჩამდენი პირისგან, ისე ამ პირის ახლო ნათესავისგან, ასევე დაკავშირებული პირისგან. ამავე ცვლილებებით გათვალისწინებულია საქართველოდან გასვლის აკრძალვა, როგორც სოციალური დაცვის ღონისძიების ერთ-ერთი სახე. ცვლილებები მეორე მოსმენის ეტაპზეა გაჩერებული.

ქართულმა ოცნებამ მხარი დაუჭირა ცვლილებებს, რომლის თანახმად დაზვერვის სამსახური სახელმწიფო უსაფრთხოების სამსახურის მმართველობის სფეროში შემავალ სახელმწიფო საქვეუწყებო დაწესებულება — ეროვნულ სადაზვერვო სააგენტო გახდა.

ოცნების მორიგი ინიციატივით გაუქმდა სპეციალური საგამოძიებო სამსახური და პროკურატურას შეუერთდა.

"საერთაშორისო დაცვის შესახებ" კანონში განხორციელებული ცვლილებებით უცხოელებისთვის გათვალისწინებულია სასჯელისა და ასევე ადმინისტრაციული სახდელის ახალი სახე − საქართველოდან გაძევება და განსაზღვრული ვადით საქართველოში შემოსვლის აკრძალვა. როგორც TI წერს, ამ გზით აპირებს „ქართული ოცნება” დაუპირისპირდეს კრიტიკულად განწყობილ უცხოელებს.

სრულად წაიკითხეთ აქ.