ევროპული საქართველოს ლიდერის, დავით ბაქრაძის თქმით თუ საქართველოს პრეზიდენტს ოპოზიციასა და ხელისუფლებას შორის დიალოგის ხელშეწყობა სურს, გიგი უგულავა უნდა შეიწყალოს. ამის შესახებ დავით ბაქრაძემ მთავარ არხთან ისაუბრა. სალომე ზურაბიშვილმა განაცხადა, რომ განიხილავს რა ფორმით ჩაერთოს დიალოგში.

"პოლიტიკური დიალოგის და კომპრომისების გზა მოკლა ქართულმა ოცნებამ გიგი უგულავას დაპატიმრებით, ამიტომ, თუ ქალბატონ ზურაბიშვილს სურს დიალოგის ხელშეწყობა, მას ამისთვის გააჩნია კონკრეტული ინსტრუმენტი ეს არის უსამართლოდ, პოლიტიკური ნიშნით დაპატიმრებული გიგი უგულავას შეწყალება რითაც ის თავიდან აგვაცილებს იმ უმძიმეს დარტყმას, რომელიც ხელისუფლებამ მიაყენა საქართველოს ინტერესებსაც და დიალოგის პროცესსაც", — თქვა დავით ბაქრაძემ.

ბაქრაძის აზრით, თუ პრეზიდენტი შეწყალებისთვის მზად არაა "პოლიტიკურ კეკლუცობასა" და ფარისევლობას თავი უნდა დაანებოს და "ბოლომდე მიხედოს ანტიკვარულ ირანულ მამლებს".

გიგი უგულავას უზენაესმა სასამართლომ 10 თებერვალს პატიმრობა შეუფარდა.თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.