დღეს, 9 იანვრის მთავრობის სხდომის შემდეგ საზოგადოებისთვის ცნობილი გახდა, რომ მთავრობა ანაკლიის კონსორციუმთან ხელშეკრულებას წყვეტს. ინფრასტრუქტურის მინისტრმა, მაია ცქიტიშვილმა თქვა, რომ შემდგომ გადავადებას პროექტზე დადებითი შედეგი არ ექნებოდა და მთავრობა ახალ პარტნიორს მოძებნის.

მინისტრმა იქვე განმარტა, რომ პორტს ეკონომიკურთან ერთად უსაფრთხოების განზომილებაც აქვს, ამიტომ გამორიცხულია საქართველოს მთავრობას ჰყავდეს ისეთი ინვესტორი, რომელიც შეუთავსებელი იქნება ქვეყნის სტრატეგიულ ინტერესებთან.

ოპოზიცია ხელისუფლებას საპირისპირო დამოკიდებულებაში ადანაშაულებს და ამბობს, რომ ანაკლიის პორტის მშენებლობა რუსეთის ინტერესების გამო შეჩერდა. ოპოზიციის ლიდერები ფიქრობენ, რომ მთავარი მიზეზი, რის გამოც ბიძინა ივანიშვილის ეს პროექტი არ უნდოდა რუსული ინტერესებია.

მმართველი პარტიის წარმომადგენლები ხელისუფლების პოზიციების გამყარებას ცდილობდნენ, ოპოზიცია კი ამ ნაბიჯს აკრიტიკებდა და რუსეთის ინტერესების გატარებას უკავშირებდა. რუსეთთან კავშირი ოპოზიციის გარდა მმართველი პარტიის წევრმა, რომან კაკულიამაც დაიანხა. თუმცა ეს ნაბიჯი მან ქვეყნის სასიკეთო ქმედებად მიიჩნია.

გია ვოლსკი — ქართული ოცნება

"4 წლის განმვალობაში რამდენჯერ გაუხანგრძლივდა ხელშეკრულება, შეეცვალა პირობები და არავის არ უფიქრია ხელშეკრულების შეწყვეტაზე და რატომ მოხდა ესე, რა განსაკუთრებული დამსახურება აქვს კონსორციუმს, რომელმაც პრაქტიკულად სახელმწიფო გადააგდო. საკმაოდ დიდი თანხა იქნა სახელმწიფოს მიერ დახარჯული და საქმის ნაცვლად პრაქტიკულად ამ სანაპიროზე ლელოს პოლიტიკური პარტიის პრეზენტაცია შემოგვთავაზა".

რომან კაკულია — ქართული ოცნება

"[ხელისუფლება] ხაზარაძეს იმიტომ დაეტაკა, რომ მან ვერ გააკეთა საგარეო კურსთან დაკავშირებით სწორი ორიენტირი; ან მისი ხედვა თუ არ დაემთხვა, ეს მისი პრობლემაა. მე გეუბნებით, ამ ნარატივში, რომ ბიძინა ივანიშვილი არის თუ არა რუსული პროექტი, თუ მისი დამოკიდებულება რუსეთის მიმართ არის ქვეყნის უსაფრთხოებიდან გამომდინარე, მე ვდგავარ იმ მხარეს, ეს არის რუსული პოლიტიკის თავიდან აცილების პოლიტიკა".

თინა ბოკუჩავა — ერთიანი ნაციონალური მოძრაობა

"ანაკლიის ღრმაწყლოვანი პორტი არის არა მხოლოდ ეკონომიკური, არამედ უდიდესი სტრატეგიული მნიშვნელობის პროექტი, რომელსაც შეეძლო ფუნდამენტურად ტრანსფორმირება საქართველოს როლის რეგიონში და უდიდესი სიკეთის მოტანა საქართველოს რიგითი მოქალაქისთვის. სწორედ ამიტომ არის ის ასეთი პრობლემა პუტინისთვის და სწორედ ამიტომ, პუტინის დავალებით, კლავს ამ პროექტს ბიძინა ივანიშვილი და რა თქმა უნდა, მოგონილია ის აბსურდი თითქოსდა დროულად არ შეასრულა ვალდებულებები ხაზარაძემ".

სერგი კაპანაძე — ევროპული საქართველო

"[ანაკლიის პორტი] იმიტომ უნდა გავაკეთოთ, რომ ამით ჩვენი უსაფრთხოება იზრდება. მაშინ იგივე ნატოზე გავავრცელოთ, რა განსხვავებაა. ჩვენი ნატოში ინტეგრაცია არ უნდა რუსეთს და ავიცილოთ რუსეთიდან მომდინარე საფრთხე და ვთქვათ უარი. იგივე ლოგიკაა. რა განსხვავებაა ამ ორ ლოგიკას შორის? ბატონი რომანის გამოსვლა თვალებისამხელი უნდა იყოს ჩვენი საზოგადოებისთვის".

ანაკლიის განვითარების კონსორციუმმა და სახელმწიფომ პროექტზე ერთობლივი მუშაობა 2016 წელს დაიწყეს. პროექტის მიხედვით, სამუშაოების სრულად დასრულების შემდეგ, ის პორტი 3 000 ჰექტარზე მეტ ფართობზე უნდა გაშლილიყო და 32 ნავმისადგომი უნდა ჰქონოდა.

ბოლო ორი წლის განმავლობაში მთავრობამ კონსორციუმის ვალდებულებების შესრულება არაერთხელ გადაუვადა. ისინი კონსორციუმს ვალდებულებების შეუსრულებლობაში ადანაშაულებდნენ მაშინ, როცა კონსორციუმი, პირიქით, მთავრობას ადანაშაულებდა ხელშეშლაში. კონსორციუმში შემავალი თიბისი ჰოლდინგის მაშინდელი ხელმძღვანელი და ახლა მოძრაობა ლელოს ლიდერი, მამუკა ხაზარაძე აცხადებდა, რომ მთავრობა ანაკლიის პორტის მშენებლობას მიზანმიმართულად უშლის ხელს.

მთავრობის მხრიდან ხელშეკრულების შეწყვეტის შემდეგ კონსორციუმი აპირებს, რომ საარბიტრაჟო სასამართლოში იდავოს.