მთავარი არხის დირექტორის და დეკანოზ გიორგი მამალაძის ადვოკატის, ნიკა გვარამიას ინფორმაციით, მამალაძემ შიმშილობა დაიწყო. ამის შესახებ გვარამიამ გლდანის ციხეში დეკანოზის მონახულების შემდეგ განაცხადა. როგორც გვარამია ამბობს, გიორგი მამალაძემ შიმშილობა დღეს, 6 იანვარს, მას შემდეგ დაიწყო, რაც პრეზიდენტის მიერ შეწყალებულთა სიაში არ მოხვდა.

"დეკანოზმა დღეს 12 საათიდან გამოაცხადა შიმშილობა. იგი არის უკიდურესად ცუდად და ეს ეტყობა. დიდი ხანია არ მინახავს და გარეგნულად უკვე ეტყობა, რომ ცუდად არის. რეალურად, ეს კაცი უბრალოდ ტყვე არ არის, იგი სიკდვილმისჯილი ტყვეა. სამწუხაროა, რომ ჩვენი ეკლესია და ჩვენი სახელმწიფო წინასაშობაოდ ერთობლიობაში აკეთებენ ამას", — განაცხადა გვარამიამ.

დღეს, 6 იანვარს, ცნობილი გახდა, რომ რამდენიმეთვიანი მორატორიუმის შემდეგ პრეზიდენტმა საშობაოდ 5 მსჯავრდებული შეიწყალა. თუმცა, საპატრიარქოს შუამდგომლობის მიუხედავად, შეწყალებულთა შორის ვერ მოხვდა დეკანოზი გიორგი მამალაძე.