პარლამენტის ყოფილი ვიცე-სპიკერი, თამარ ჩუგოშვილი ამბობს, რომ მმართველმა ძალამ პარტნიორებისათვის მიცემული მნიშვნელოვანი პირობები ვერ შეასრულა. მისი თქმით, აღმოჩნდა, რომ ყველაზე ეფექტურად მთავრობა ტროლებს ამუშავებს.

ასევე, ჩუგოშვილი ფიქრობს, რომ ფეისბუქის ამბავთან დაკავშირებით საპარლამენტო კომისია უნდა შეიქმნას.

"ძალიან მნიშვნელოვანი პირობა არ შევასრულეთ, ძალიან პოლარიზებული გარემო შევქმენით, ძალიან მძიმე არჩევნებისკენ მივდივართ. სავარაუდოდ, არანაირ საარჩევნო ცვლილებებსაც არ განვახორციელებთ. სასამართლო სისტემაში ამდენი მილიონი დახარჯეს, რომ ჩვენ მოსამართლეებს ესწავლათ და ამერიკაში ენახათ როგორ მუშაობს მოსამართლე და მაინც ასე გავაკეთეთ და მაინც არ მივაქციეთ მათ არანაიარი ყურადდღება. ახლა ბოლოს აღმოჩნდა, რომ ყველაზე ეფექტურად რასაც ვამუშავებთ არის ტროლები და ა.შ.", — განაცხადა ჩუგოშვილმა საზოგადოებრივი მაუწყებლის ეთერში.

20 დეკემბერს სოციალური მედიის გიგანტმა ფეისბუქმა 396 გვერდი და ჯგუფი და ათეულობით ყალბი ანგარიში წაშალა. ამის მიზეზად დეზინფორმაციული და პროპაგანდისტული ინფორმაციების გავრცელება დასახელდა, რომლის კვალმა ფეისბუქის მკვლევარები მმართველ პარტიამდე, ქართულ ოცნებამდე მიიყვანა.