პარლამენტის თავმჯდომარის მოადგილე, კახა კუჭავა ამბობს, რომ ფეისბუქით დეზინფორმაციის გავრცელებასთან და ყალბ ანგარიშებთან დაკავშირებულ პრობლემაზე, ფეისბუქს 2017 წელს მიმართეს. ამის შესახებ მან ფეისბუქის მიერ მმართველ გუნდთან დაკავშირებული დეზინფორმაციის გამავრცელებელი გვერდების წაშლაზე საუბრისას განაცხადა.

კუჭავას თქმით, ფეიქნიუსი ცალმხრივად არ მოქმედებს და ფეისბუქზე ძალიან ბევრი ხელისუფლებასაც "უტევს".

"2017 წლის დასაწყისში სხვა ქვეყნის წარმომადგნელებთან ერთად ვეწვიეთ ფეისბუქის ოფისს. განსაკუთრებით ხაზი გავუსვით ამ პროლემას არა მხოლოდ ჩვენს ქვეყანაში, არამედ სხვა ქვეყნებშიც. მაშინ მოვუწოდეთ ჩვენ, რომ როგორც საქართველოში, ისე სხვა ქვეყნებში,მსგავსი ფეიქნიუსის გამავარცელებელ და აგრესიის მატარებელი პროფაილებზე, რომლებიც რეალურად არ წარმოადგენენ კონკრეტულ ადამიანს, ყოფილიყო შესაბამისი ღონისძიება ჩატარებული და საქართველოზეც განსაკუთრებული ყურადღება გამახვილებულიყო", — განაცხადა კუჭავამ TV პირველის ეთერში.

20 დეკემბერს სოციალური მედიის გიგანტმა ფეისბუქმა 396 გვერდი და ჯგუფი და ათეულობით ყალბი ანგარიში წაშალა. ამის მიზეზად დეზინფორმაციული და პროპაგანდისტული ინფორმაციების გავრცელება დასახელდა, რომლის კვალმა ფეისბუქის მკვლევარები მმართველ პარტიამდე, ქართულ ოცნებამდე მიიყვანა.