"ვხედავთ, სახელმწიფო ბევრს ცდილობს, მაგრამ, სამწუხაროდ, ასეთი უბრალო რამე, ერთი კაცის [ვაჟა გაფრინდაშვილის] დახსნა ვერ შეძლო", — თქვა ბოდბელმა ეპისკოპოსმა იაკობმა ბოდბეში ქადაგებისას. იგი ორთვიანი პაუზის შემდეგ დღეს, 22 დეკემბერს პირველად გამოვიდა ამბიონზე.

ეპისკოპოსმა სხვა საკითხებთან ერთად ოკუპირებულ ცხინვალში ექიმ ვაჟა გაფრინდაშვილის გადასვლაზე ისაუბრა და თქვა, რომ ვაჟა წესიერი კაცი იყო და ახლა ძალიან სწორად იქცევა:

"კაცი წავიდა, უნდა დახმარებოდა ადამიანს. დაიჭირეს, მიუსაჯეს, ამით ვაჟას [გაფრინდაშვილს] არაფერი არ აკლდება, ვაჟას ემატება. როდესაც ადამიანი გულანთებული ექიმი ხარ, რომ მიდიხარ, მაგასაც არ უყურებ, შენს სიცოცხლეს გვერდზე დებ... მე მოვუწოდებ ოსებს, ოსები კავკასიაში... და ჩვენთან ვაჟკაცობა ყოველთვის ფასდება. შეხედონ, ლაჩარი ვაჟა უნდათ? ვაჟა რასაც ამბობს, რაც გულში აქვს იმას ამბობს. მინდა მივმართო მათ, დააფასონ კაცის ეს საქციელი, მართლმადიდებელი ადამიანის, კარგი ქართველის კარგი საქციელი".

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზე იმყოფება.

ექიმი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

გაფრინდაშვილის გათავისუფლების მოთხოვნით ოჯახმა, ოპოზიციამ და მთავრობამ სხვადასხვა საერთაშორისო პარტნიორებს მიმართა, თუმცა უშედეგოდ. ხელისუფლების წარმომადგენლები აცხადებდნენ, რომ ყველაფერს აკეთებდნენ გაფრინდაშვილის დროულად დასაბრუნებლად.