ქართული ოცნების ცენტრალურ ოფისში უმრავლესობის სხდომის დასრულების შემდეგ დეპუტატმა, მამუკა მდინარაძემ განაცხადა, რომ პარლამენტში კონსტიტუციური რეფორმის რესურსი არ არსებობს. სხდომას ბიძინა ივანიშვილიც ესწრებოდა.

როგორც მან აღნიშნა, პარტიის წევრებმა მაჟორიტარულ სისტემასთან დაკავშირებით დიმიტრი ხუნდაძის ინიციატივა განიხილეს. მდინარაძის თქმით, ქართული ოცნების პარტიის უმრავლესობა ამ ცვლილებას მხარს არ დაუჭერს, თუმცა დეპუტატები საკონსტიტუციო ცვლილებისთვის ხელმოწერების შეგროვებას მაინც გააგრძელებენ.

"მე არ მგონია, რომ შეგროვდება ნახევარი მილიონის ან მილიონის ადამიანის ხელმოწერა, შემდეგ წარმოადგენენ ამას პარლამენტში და გვაიძულებენ, რომ გადავიდეთ ე.წ. ამერიკულ სისტემაზე. ყველა სისტემა არის ლეგიტიმური, ყველა მათგანი მუშაობს განვითარებულ დემოკრატიულ ქვეყნებში, მაგრამ ამ შემთხვევაში, საქართველოს პირობებში, მე არ ვფიქრობ და გუნდიც არ ფიქრობს ასე", — აღნიშნა მდინარაძემ ჟურნალისტებთან.

მისივე თქმით, იმასთან დაკავშირებით, რომ აღნიშნულ ინიციატივას გუნდში მხარდაჭერა არ ექნება, არაერთი საუბარი ჰქონდათ:

"ისინიც კარგად აცნობიერებენ ამას და ამბობენ, რომ გავალთ ხალხში შევაგროვებთ ხელმოწერებს, გვექნება 200 ათასი ხელმოწერა, რომელიც აიძულებს საქართველოს პარლამენტს განიხილოს ეს ინიციატივა. მე ამის მოლოდინი არ მაქვს. შესაძლებელია შეაგროვონ ხელმოწერების გარკვეული რაოდენობა, თუმცა საქართველოს პარლამენტში კონსტიტუციური ცვლილების რესურსი არ არსებობს, მით უმეტეს თუ საუბარია სრულად მაჟორიტარულ სისტემაზე".

პროპორციული საარჩევნო სისტემის ჩაგდების შემდეგ, კანონპროექტის მოწინააღმდეგე მმართველი პარტიის დეპუტატმა, დიმიტრი ხუნდაძემ სრულად მაჟორიტარულ სისტემაზე გადასვლის ინიციატივა გამოთქვა. მიუხედავად იმისა, რომ უმრავლესობის ლიდერებმა ინიციატივა დაიწუნეს, ხუნდაძემ პარლამენტში საინიციატივო ჯგუფი უკვე დაარეგისტრირა. გარდა ამისა, დეპუტატმა გამოთქვა იდეა, რომ ორპალატიანი პარლამენტი შეიქმნას. ხუნდაძემ აღნიშნა, რომ ეს ინიციატივა 2020 წლისთვის არ აქვს, თუმცა არ დაუკონკრეტებია, რომელი წლის არჩევნებს გულისხმობდა.