თანამედროვე მსოფლიო ლიტერატურის ერთ-ერთ ყველაზე ცნობილ და გავლენიან ჩეხ ავტორს, მილან კუნდერას ორმოცზე მეტი წლის განმავლობაში ემიგრაციაში ყოფნის შემდეგ ჩეხეთის მოქალაქეობა დაუბრუნეს.

მილან კუნდერა თავის შემოქმედებაში ყოველთვის დიდ ადგილს უთმობდა საბჭოთა ძალების მიერ ჩეხეთის ექსპანსიის კრიტიკულად აღწერას, რის გამოც ის პოლიტიკურ დევნილად იქცა — 1975 წელს სამშობლო დატოვა და საფრანგეთში გაიქცა. 1979 წელს მას ჩეხეთის მოქალაქეობა გაუუქმდა და ორი წლის შემდეგ საფრანგეთის მოქალაქეობა მიიღო.

კუნდერა მთელს მსოფლიოსთან ერთად ქართველი მკითხველებისთვისაც ცნობილია თავისი ისეთი პოპულარული რომანებით, როგორებიცაა ყოფის აუტანელი სიმსუბუქე, შეუცნობელი და უკვდავება. აღსანიშნავია, რომ 1980-იანი წლების მიწურულამდე სამშობლოში მისი წიგნები აკრძალული იყო, როგორც ანტისაბჭოთა და ანტისახელმწიფოებრივი ლიტერატურა. 1988 წელს დაწერილი რომანი უკვდავება მილან კუნდერას ბოლო რომანი იყო, რომელიც მშობლიურ ენაზე დაწერა — მას შემდეგ ის ძირითადად მხოლოდ ფრანგულად წერდა.

საფრანგეთში ჩეხეთის ელჩის, პეტრ დრულაკის განცხადებით, 90 წლის მწერალს მოქალაქეობის დაბრუნების დამადასტურებელი მოწმობა თავად მიუტანა პარიზში მდებარე ბინაში:

"ეს იყო ძალიან მნიშვნელოვანი სიმბოლური აქტი, რომლითაც უდიდესი ჩეხი მწერალი ჩეხეთის რესპუბლიკას დაუბრუნდა".

თავად მილან კუნდერას სამშობლოსთან დაკავშირებით მუდამ ორაზროვანი დამოკიდებულება ჰქონდა. მაგალითად, 1984 წელს New York Times-სთვის მიცემულ ინტერვიუში განაცხადა, რომ სამშობლო მისთვის "რაღაც გაურკვეველი, ბუნდოვანი" იყო.

ჩეხეთში აქამდეც ჰქონდათ მცდელობა, რომ მწერლისთვის ეჩვენებინათ, თუ რამდენად აფასებენ მას ახლა: 2008 წელს თავისი შემოქმედებისთვის საპატიო ეროვნული ჯილდო გადასცეს, 2009 წელს კი თავისი მშობლიური ქალაქის, ბრნოს საპატიო მოქალაქედ დაასახელეს, თუმცა ორივე შემთხვევაში მილან კუნდერამ მიპატიჟებაზე უარი განაცხადა და პარიზში დარჩენა ამჯობინა.