პირველი დეკემბრიდან ევროკომისიის ახალი შემადგენლობა მუშაობას ოფიციალურად შეუდგა. ევროკომისიის პრეზიდენტი ისტორიაში პირველად ქალი — ურსულა ფონ დერ ლეიენი იქნება. ევროპული საბჭოს პრეზიდენტის თანამდებობაზე დონალდ ტუსკი ბელგიის ყოფილმა პრემიერ-მინისტრმა, შარლ მიშელმა შეცვალა.

ფონ დერ ლეიენი 61 წლისაა და გერმანიის კანცლერის, ანგელა მერკელის პოლიტიკურ მოკავშირედ ითვლება. ის გერმანიის თავდაცვის მინისტრიც იყო.

ევროკომისია 5 წლის ვადით, 2024 წლამდე აირჩიეს. მისი შემადგენლობა ევროპარლამენტმა უკვე დაამტკიცა. კომისიას მხარი 461-მა ევროპარლამენტარმა დაუჭირა, წინააღმდეგი იყო 157.

კომისიის შემადგენლობაში 27 ადამიანია — ევროკავშირის წევრი ქვეყნების ყველა წარმომადგენელი, გარდა დიდი ბრიტანეთისა, რომელიც ალიანსიდან გასვლისთვის ემზადება. ევროკავშირის შეთავაზების მიუხედავად, ლონდონმა თავისი წარმომადგენლის დანიშვნაზე უარი თქვა.

ევროკომისია ევროკავშირის მთავარი აღმასრულებელი ორგანოა. ის საერთო ევროპულ კანონმდებლობას ქმნის და აკონტროლებს, თუ როგორ ასრულებენ ევროკავშირის წევრი ქვეყნები არსებულ ნორმებს.