მმართველი გუნდის სხვა წევრების მსგავსაც დიმიტრი ხუნდაძეც ეკლესიაში მიმდინარე მოვლენებში ოპოზიციას ადანაშაულებს. ეს საკითხი მან ერთ-ერთ მიზეზად დაასახელა, რომლის გამოც პროპორციული საარჩევნო სისტემის მიღება არ სურდა.

"საპატრიარქოზე, ნახეთ თქვენ როგორი გალაშქრება იყო. ეს იყო პრაქტიკულად სპეცოპერაცია... ანუ მათ უკვე დაიწყეს თავისი გეგმის ბოლო აკორდის განხორციელება, რომ ყველაზე ძლიერ, ფუნდამენტურ საყრდენზეც დაერტყათ — ეს იყო რწმენა", — განაცხადა ხუნდაძემ.

მან განმარტა, რომ 2020 წელს პროპორციული სისტემის ჩატარების აუცილებლობაზე საუბრისას მმართველ გუნდში უთხრეს, რომ ეს დააწყნარებდა ქუჩას და ოპოზიციურ სპექტრს. თუმცა, მისი თქმით, ყველაფერი პირიქით მოხდა და დაიწყო ყველა ინსტიტუტის, მათ შორის საპატრიარქოს დისკრედიტაცია.

ხუნდაძის მტკიცებით, პროპორციული საარჩევნო სისტემის მიღება იმიტომ არ სურს, რომ ნაციონალურ მოძრაობას რევანშის საშუალება არ ჰქონდეს.

საპატრიარქოში მიმდინარე მოვლენების ოპოზიციას და "პარლამენტზე ძალადობრივ შეტევას" დაუკავშირა პრემიერ-მინისტრმა და პარლამენტის თავმჯდომარემაც.