ემილია კლარკმა თქვა, რომ სამეფო კარის თამაშებში შიშველი სცენების შესრულების დროს თავს არაკომფორტულად გრძნობდა. ბრიტანელი მსახიობი საკულტო სერიალში დედოფალ დეინერის ტარგარიენს ასახიერებდა. HBO-ს შოუში სექსისა და ძალადობის სცენები ღიად იყო ნაჩვენები.

კლარკი 23 წლის იყო, როდესაც GOT-ის პირველ სეზონში იღებდნენ. მისი თქმით, რამდენიმე "შემაძრწუნებელი" შიშველი სცენის წინ ხშირად უტირია. კლარკი დასძენს, რომ სცენარი როლის მიღების შემდეგ გაუგზავნეს და მისი კითხვის დროს აღმოაჩინა, როგორი სცენების შესრულება დასჭირდებოდა როლისთვის:

"სწავლა ახალი დასრულებული მქონდა და ამას ისე მივუდექი, როგორც სამუშაოს, რომელიც კარგად უნდა შემესრულებინა: თუ ეს სცენარშია, მაშინ საჭიროც იქნება — ვეუბნებოდი ჩემს თავს. ეს ასეა, მე ამაში აზრს ჩავდებ, ამას გავაკეთებ და ყველაფერი კარგად იქნება.

გადასაღებ მოედანზე ასეთ მდგომარეობაში არასდროს ვყოფილვარ. ფილმში მანამდე ორჯერ ვმონაწილეობდი, მაგრამ ახლა სრულიად შიშველი ვიყავი ამდენი ადამიანის წინაშე და არ ვიცოდი, რა უნდა გამეკეთებინა, არ ვიცოდი რას ელოდნენ ჩემგან, არ ვიცოდი რა სურდა ხალხს და არ ვიცოდი რა მინდოდა მე".

მსახიობის სიტყვებით, პირველი სეზონის განმავლობაში ფიქრობდა, რომ კონკრეტული მოთხოვნების გასახმოვანებლად საკმარისი "ღირებული" არ იყო. კლარკი, რომელიც ახლა 33 წლისაა, ამბობს, რომ რამდენიმე სცენაში დუბლიორი მონაწილეობდა და დასძენს, რომ გადასაღებ მოედანზე ხალ დროგოს როლის შემსრულებელი ჯეისონ მომოა მის მიმართ მზრუნველობას ავლენდა.

სერიალის პირველ სეზონში ხალ დროგო დეინერისს ქორწინების პირველ ღამეს აუპატიურებს.

"ის ჩემზე მეტს ტიროდა", — იხსენებს ემილია კლარკი და დასძენს, რომ პარტნიორში გაუმართლა. მსახიობის თქმით, მომოას გარეშე ბევრი რამ მისთვის უფრო რთული იქნებოდა:

"ჯეისონს ამ როლამდე დიდი გამოცდილება ჰქონდა. ის მეუბნებოდა: "ძვირფასო, ეს ასე უნდა იყოს და ეს ასე არ უნდა იყოს. ყველაფერს გავაკეთებ, რომ ეს საუცხოოდ გამოვიდეს". სცენის გადაღების შემდეგ კი ყველას ჩემს ნაცვლად ახსენებდა, რომ ხალათი უნდა მოეტანათ, რადგან ვკანკალებდი. ის ძალიან მზრუნველი და კეთილი იყო ჩემ, როგორც ადამიანის მიმართ".

ემილია კლარკი ამბობს, რომ სამეფო კარის თამაშების შემდეგ გადაწყვეტილებებს უფრო ჭკვიანურად იღებს და მეტს ფიქრობს იმაზე, თუ რამდენად კომფორტულად იგრძნობს თავს სხვადასხვა როლებისთვის შიშველი სცენის გადაღებისას. თუმცა, კლარკი დასძენს, რომ ის GOT-ის გადაღებებზეც აპროტესტებდა კონკრეტულ სცენებს:

"ვჩხუბობდი გადასაღებ მოედანზე და ვამბობდი, რომ მაგალითად "ეს ზეწარი აწეული უნდა იყოს", ისინი კი მეუბნებოდნენ "არ გააწბილო შენი GOT-ის ფანები", რასაც გინებით ვპასუხობდი".

HBO-ს წარმომადგენლებს და სერიალის პროდიუსერებს ემილია კლარკის განცხადებაზე კომენტარი ჯერ არ გაუკეთებიათ.