სოხუმში, აფხაზეთის დე-ფაქტო რესპუბლიკის სახელმწიფო ტელევიზიასთან უცნობმა პირმა თავი აიფეთქა. ამის შესახებ ინფორმაციას აფხაზური საინფორმაციო სააგენტოები ავრცელებენ.

დე-ფაქტო აფხაზეთის შინაგან საქმეთა მინისტრმა, ასლან კობახიამ Apsua Tv-ს განუცხადა, რომ ეს იყო "თვითმკვლელი ტერორისტი", რომელიც მარტო არ მოქმედება. ამჟამად აფეთქების ადგილზე მიმდინარეობს საგამოძიებო მოქმედებები. როგორც კობახია ამბობს, პირი, რომელმაც თავი აიფეთქა, დაახლოებით 35-40 წლისაა.

ასლან კობახიამ სოხუმის მცხოვრებთ სიფრთხილისკენ მოუწოდა და იმ შემთხვევაში თუ სადმე იპოვიან უცხო საგანს, დაუყონებლივ შეატყობინონ სამართალდამცავებს.

აფეთქებიდან რამდენიმე საათში საგანგებო სხდომა მოიწვია დე-ფაქტო რესპუბლიკის პრეზიდენტმა, რომელმაც ძალოვან მინისტრებს საქმის დაუყონებლივი და ყოველმხრივი გამოძიება დაავალა. გარდა ამისა, გააძლიერეს უსაფრთხოების ზომები ყველა მნიშვნელოვან ობიექტზე.