უზენაესის მოსამართლეობის კანდიდატი, ქეთევან ცინცაძე ამბობს, მოსამართლე მიხეილ ჩინჩალაძესთან მის თანაშემწეობას შერჩევის პროცესზე არანაირი გავლენა არ მოუხდენია. არასამთავრობო ორგანიზაციები მოსამართლე ჩინჩალაძეს ე.წ. სასამართლო კლანის ლიდერად განიხილავენ.

დღეს, 6 ნოემბერს ქეთევან ცინცაძეს პარლამენტში უსმენენ. ნაციონალური მოძრაობის დეპუტატმა, რომან გოცირიძემ მოსამართლეობის ცინცაძეს ჰკითხა, იუსტიციის უმაღლეს საბჭოში შერჩევისას როგორი ფაქტორი იყო ჩინჩალაძის თანაშემწეობა.

"ვფიქრობ, რომ არანაირი ფაქტორი არ შეიძლებოდა ჰქონდეს გარკვეული პერიოდი მოსამართლეობის თანაშემწეობას, როდესაც არაერთ მოსამართლესთან ხარ და თან ის მოსამართლე საბჭოს მოქმედი საბჭოს წევრი არაა. კიდევ ერთხელ გიდასტურებთ, რომ ამ საკითხს არანაირი გავლენა არ შეიძლებოდა ჰქონოდა", — უპასუხა უზენაესის კანდიდატმა.

ქეთევან ცინცაძე 2017 წლიდან იუსტიციის უმაღლესი საბჭოს დამოუკიდებელი ინსპექტორია. 2011-2017 წლებში იგი იყო ადმინისტრაციულ საქმეთა პალატის მოსამართლის თანაშემწე. 2009-2011 წლებში კი საქართველოს უზენაესი სასამართლოს ადმინისტრაციულ საქმეთა პალატის მოსამართლის რეფერენტად მუშაობდა. 2011-2017 წლებში იყო უზენაესი სასამართლოს ადმინისტრაციულ საქმეთა პალატის მოსამართლის, მათ შორის, მიხეილ ჩინჩალაძის თანაშემწე.

კოალიცია დამოუკიდებელი და გამჭვირვალე მართლმსაჯულებისთვის დამოუკიდებელი ინსპექტორის შერჩევის პროცესის გაუმჭვირვალობაზე მიუთითებდა: "ინფორმაციის სრულად დახურვა აჩენს ეჭვებს კონკურსის შედეგით საბჭოს არაჯანსაღ დაინტერესებაზე".

დამოუკიდებელი ინსპექტორის შერჩევის "გაუმჭვირვალე და დახურული პროცესის საეჭვოობაზე" მიუთითებს იუსტიციის უმაღლესი საბჭოს მონიტორინგის ანგარიში, რომელშიც ნათქვამია, რომ ქეთევან ცინცაძის ბიოგრაფიამ და მისი არჩევის "გაუმჭვირვალე პროცესმა" ეჭვი გააჩინა ინსპექტორის რეალურ დამოუკიდებლობასთან დაკავშირებით.