საპატრიარქოს საზოგადოებასთან ურთიერთობის სამსახურის ხელმძღვანელი ანდრია ჯაღმაიძე აცხადებს, რომ შეწყალებაზე შუამდგომლობას დეკანოზ გიორგი მამალაძისა და მისი ოჯახის ულტიმატუმი და შანტაჟი აჭიანურებდა.

"საპატრიარქოში არასდროს იყო განწყობა, რომ მაინცდამიანც ციხეში ყოფილიყო დეკანოზი გიორგი მამალაძე... როგორც კი დგებოდა საკითხი, რომ თუ მაისის თვემდე არ დადგებოდა შუამდგომლობის საკითხი, მე მაშინვე გამოვაქვეყნებ, მაისის თვემდე საპატრიარქოში წყდებოდა ყველანაირი საუბარი და მსჯელობა შეწყალების შუამდგომლობაზე.

როგორც კი დაისმებოდა შანტაჟის ტონში რაიმე წინადადება, მაშინვე საპატრიარქოს პოზიცია იყო, რომ გელოდებით, გამოაქვეყნეთ და მერე ვილაპარაკოთ", — განაცხადა მან ტელეკომპანია პირველის ეთერში, გადაცემა ხალხის პოლიტიკაში.

მისი თქმით, საპატრიარქო იმის ილუსტრაციას ცდილობდა, რომ ეს არ ადარდებდა და ამის გამო შეწყალების განხილვას არ დააჩქარებდა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.

ამ პერიოდის განმავლობაში დეკანოზი და მისი ოჯახი ამტკიცებდა, რომ ის უდანაშაულოა. დეკანოზის ოჯახის წევრები აცხადებდნენ, რომ მამალაძეს ჰქონდა კადრები, რომელიც საპატრიარქოში ცოდვას ამხილებდა. ისინი მოითხოვდნენ, რომ საპატრიარქოს შეწყალების შუამდგლომლობა დაეყენებინა.

დეკანოზის შეწყალებაზე შუამდგომლობის გადაწყვეტილება საპატრიარქომ თითმის ერთი წლის შემდეგ, 28 ოქტომბერს სინოდის სხდომაზე მიიღო.