თიბისის დამფუძნებელმა და მოძრაობა ლელოს ლიდერმა, მამუკა ხაზარაძემ საქართველოს პატრიარქის, ილია მეორის მიმართ გაჟღერებული ბრალდებები რამდენიმე დღის წინ საქართველოში მასშტაბურ კიბერშეტევას დაუკავშირა. მან ამ ორ საკითხს შორის პარალელი რუსთავი 2-ის ეთერში გაავლო.

"საეჭვოდ დაემთხვა გუშინ და გუშინ წინ კიბერშეტევა და დღევანდელი გზავნილები ტელევიზიებში, რომ თურმე სერვერებში რამე არსებობს... გასაგებია, რომ ფარული ჩანაწრების უღირსი ომი გრძელდება. მე ყველაფერს ვუკავშირებ ერთმანეთს, არ მინდა რადიკალურად გმომივიდეს, მაგრამ იმდენი რამე ემთხვევა ერმანეთს... შემთხვევით ამ ქვეყანაში არაფერი არ ხდება", — თქვა ხაზარაძემ.

მისი თქმით, ამ ხელისუფლების პირობებში საზოგადოებას "ტყუილ-მართალი აერია ერთმანეთში", რითაც სახელმწიფოებრიობას ეთხრება ძირი.

"მე ვფიქრობ, ის, რა პროცესიც მიმდინარეობდა ბოლო ორი წლის განმავლობაში, ეკლესიაზე, რომელსაც აქვს მაღალი ნდობის ხარისიხი, მიზანმიმართულ ზეწოლაზე მეტყველებდა და დღეს კულმინაციას მიაღწია", — თქვა ხაზარაძემ.

დღევანდელი, 31 ოქტომბრის სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი". მოგვიანებით მეუფემ განმარტა, რას ნიშნავს სიტყვა "პიდარასტია" და პატრიარქი "ჭაბუკების გახრწნაში" დაადანაშაულა.

სინოდის განცხადებით, მეუფე პეტრეს ცოდვის მოუნანიებლობის გამო შეუჩერეს მღვდელმსახურების უფლება და მონასტერში წასვლისკენ მოუწოდეს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.