ამერიკის ხმის ინფორმაციით, ოქტომბრის დასაწყისში კანადის ქალაქ ტორონტოში გამართულ პრეზენტაციაზე ქართველმა ექიმებმა კიბოს მკურნალობის ინოვაციური მეთოდი წარმოადგინეს.

გამოგონების ავტორები არიან კანადაში მცხოვრები ბესიკ სურგულაძე, რომელიც მედიცინის მეცნიერებათა დოქტორი, კორპორაცია ფარმა კანადას დირექტორია და თამარ ცქიტიშვილი, მედიცინის მეცნიერებათა დოქტორი და ფარმა კანადას წამყვანი მეცნიერ-თანამშრომელი.

სამეცნიერო ჯგუფი დამიზნებითი ჰიპერთერმული თერაპიის სამკურნალო-დიაგნოსტიკური მეთოდის შემუშავებაზე დაახლოებით 10 წელია მუშაობს. მათთან ერთად კვლევებში სხვადასხვა დროს მონაწილეობდნენ რაიერსონის უნივერსიტეტი (კანადა), მორფოლოგიის ინსტიტუტი (საქართველო) და ორგანიზაცია ახალი ტექნოლოგიების ტრანსფერი (გერმანია).

ბესიკ სურგულაძის განმარტებით, რომელსაც ამერიკის ხმა კანადაში დაუკავშირდა, საგანგებოდ ამ მეთოდისთვის შემუშავდა ინოვაციური დამიზნებითი ჰიპერთერმიის აპარატი და პრეპარატი/მარკერი, რომელიც მაგნეტიტის ნანო-ნაწილაკების ბაზაზე შეიქმნა.

ამ ეტაპზე მიმდინარეობს მუშაობა მეთოდის კლინიკურ დანერგვაზე ისრაელში, თელ-ავივის უნივერსიტეტში და საქართველოში, კიბოს კვლევის ცენტრში. ბესიკ სურგულაძე იმედოვნებს, რომ ინოვაციური მეთოდის კლინიკური აპრობაცია უახლოეს თვეებში განხორციელდება.

ამერიკის ხმის ჟურნალისტის კითხვაზე, თუ რა გვერდითი მოვლენები აქვს მათ მიერ შექმნილ პრეპარატს, ბესიკ სურგულაძე ამბობს:

"პრეპარატს არ გააჩნია გამოვლენილი გვერდითი მოვლენები იმდენად, რამდენადაც ის ორგანიზმში არ შედის რეაქციაში არცერთ ორგანულ ნივთიერებასთან და შეუცვლელი სახით გამოიყოფა ორგანიზმიდან. მისი თერაპიული ეფექტი ემყარება მის ფიზიკურ და არაქიმიურ თვისებებს... მორფოლოგიური კვლევებით დადგინდა, რომ თვითონ ტემპერატურული ეფექტი ნაწილაკიდან მხოლოდ ნახევარ მილიმეტრზე ვრცელდება, რაც იძლევა მისი მკვეთრად ლოკალიზაციის საშუალებას და არ მოქმედებს ჯანსაღ ქსოვილზე".

თბილისში მოღვაწე პროფესორის და ონკოლოგის რემა ღვამიჩავას თქმით, მისი დაკვირვებითაც მეთოდი უსაფრთხოა და ამასთან რამდენიმე უპირატესობა გააჩნია:

"პირველ რიგში, პრეპარატი არ არის რადიოაქტიური. გარდა ამისა, იძლევა გაცილებით უფრო ზუსტი დიაგნოზის დასმის საშუალებას, რაც გამოცდილი ონკოლოგის თქმით, მკურნალობის სწორად წარმართვის ერთ-ერთ მთავარ წინაპირობას ქმნის".

ქართველი მეცნიერები იმედოვნებენ, რომ დამიზნებითი ჰიპერთერმული თერაპიის მეთოდი წარმატებული იქნება, ვინაიდან იძლევა როგორც მოსაზღვრე, ასევე სხვა სავარაუდოდ დაზიანებული ლიმფური ჯირკვლების ოპერაციამდელი ლოკალიზაციის, ოპერაციის მსვლელობის დროს ამ უკანასკნელთა გამოვლენის და მათი ტრავმული ამოკვეთის საშუალებას, ასევე ოპერაციის შემდგომ პერიოდში დარჩენილ ლოკალურ მიკროლიმფურ ჯირკვლებზე დამიზნებითი თერმული ზემოქმედების საშუალებას.

თერაპიის შედეგად, შემცირდება ოპერაციის ხანგრძლივობაც, გართულებების რაოდენობა და მეორადი მეტასტაზირების ალბათობა.