თბილისის მერის, კახა კალაძის ინფორმაციით, დღეისთვის A კატეგორიის 11 ათასამდე ტაქსია რეგისტრირებული. ამის შესახებ მან დედაქალაქის მთავრობის სხდომაზე ისაუბრა.

"პირველი დღეების განმავლობაში ნაკლები იყო და გარკვეულ პრობლემას წარმოადგენდა, 2 000-მდე იყო, გასულ კვირას 8 000, დღეისთვის კი 11-ია", — თქვა მერმა.

მისი განცხადებით, მანქანის მწყობრში მოყვანის შემთხვევაში, ნებისმიერ ადამიანს შეუძლია A კატეგორიაში დარეგისტრირება. ხოლო ვისაც არ სურს, კალაძის თქმით, შეუძლიათ, B კატეგორიაში გააგრძელონ მუშაობა.

კალაძის ინფორმაციით, ამ დროისთვის ტაქსის 9 ათასამდე მანათობელია გაცემული.

"მგონია, რომ საკმაოდ ლამაზია, მოუხდა ქალაქს და ასევე, მგზავრებისთვისაც საინტერესოა, მარტივად შეუძლიათ, განასხვავონ ტაქსი, რომელიც დაკავებულია და რომლის გაჩერების შესაძლებლობაც აქვთ", — აღნიშნა მან.

რაც შეეხება ჯარიმებს, კალაძის თქმით, პირველი ოქტომბრიდან სულ 2 000-მდე ტაქსის მძღოლია დაჯარიმებული, მათგან 700 რეფორმის ამოქმედების დღეს დაჯარიმდა. მისივე თქმით, პირველ ოქტომბერს დაჯარიმებულებს ერთჯერადი ამნისტია შეეხოთ, ხოლო ვინც პირველი ოქტომბრის შემდეგ დაჯარიმდა, მათ თანხის გადახდა მოუწევთ.

პირველი ოქტომბრიდან თეთრი ფერის ტაქსების რეგულაცია ძალაში შევიდა. თბილისის მერიის ახალი რეგულაციით, ტაქსის მომსახურებას კლიენტებს ვეღარ გაუწევენ სამკარიანი და მარჯვენასაჭიანი ავტომობილები. გარდა ამისა, ტაქსით მომსახურების შესაბამისი ლიცენზიის გარეშე განხორციელება 200 ლარით ჯარიმდება. ხოლო თუ კომპანიის ტაქსები მხოლოდ გამოძახების სერვისით მოემსახურებიან მგზავრებს, მაშინ მათზე თეთრად შეღებვის ვალდებულება არ გავრცელდება.

მერიის რეფორმებს ტაქსის მძღოლების აქციები მოჰყვა, ისინი ამბობდნენ, რომ თეთრად გადაღებვის შემთხვევაში ხარჯი მერიის მიერ გადაცემული ვაუჩერით სრულად ვერ იფარებოდა. გარდა ამისა, მათი განმარტებით, გადაღებილი მანქანის ფასი გადაუღებავთან შედარებით დაბალია. ამის შემდეგ მერიამ მძღოლებს გადაღების ნაცვლად ფირის გადაკვრა შესთავაზა.