2016 წლის 28 მაისს ჩემპიონთა ლიგის ფინალში ერთმანეთს ორი ესპანური გუნდი, ორივე მადრიდული კლუბი, რეალი და ატლეტიკო დაუპირისპირდებიან.

გუნდებმა ნახევარ ფინალებში, ორი მატჩის ჯამში, მანჩესტერ სითი და მიუნხენის ბაიერნი დაამარცხეს.

დიეგო სიმეონეს გაწვრთნილმა ატლეტიკომ პეპ გუარდიოლას ბაიერნთან ორი მატჩის ჯამში 2-2 ითამაშა და გასვლაზე გატანილი გოლის წყალობით შემდეგ ეტაპზე გადავიდა.

ზიდანის რეალმა კი მანუელ პელეგრინის სითი მინიმალური ანგარიშით 1-0 დაამარცხა.

ატლეტიკო და რეალი ერთმანეთს ჩემპიონთა ლიგის ფინალში მეორედ დაუპირისპირდებიან. პირველი მადრიდული დერბი ამ ტურნირის დასკვნით ეტაპზე 2013-2014 წლის სეზონში ლისაბონში გაიმართა. აღნიშნული თამაში ერთ-ერთი ყველაზე კონტროვერსიული გამოდგა, რადგან ატლეტიკო მატჩის 93-ე წუთამდე 0:1-ს იგებდა, მაგრამ მსაჯის დამატებულ 5 წუთში მადრიდელმა სერხიო რამოსმა კუთხურიდან ჩამოწოდებული ბურთი თავით მეტოქის კარში გადააგზავნა.

გულშემატკივართა ნაწილი თვლიდა, რომ მსაჯის დამატებული დრო არაადეკვატურად დიდი და მადრიდის რეალის მიმართ გამოვლენილი ფავორიტიზმი იყო.

ძირითადი დრო ფრედ 1-1 დამთავრდა.

დამატებით 15 წუთიან ტაიმებში კი რეალმა კიდევ 3 ბურთი გაიტანა, 110-ე წუთზე ბეილმა, 118-ეზე მარსელომ და 120-ეზე რონალდომ პენალტი შეაგდო.

წლევანდელი ფინალი იტალიაში, ჯუზეპე მეაცას სახელობის იგივე სან სიროს სტადიონზე გაიმართება.