პერუში პრეზიდენტმა, მარტინ ვისკარამ პარლამენტი დაშალა. თავის მხრივ საკონმდებლო ორგანომ თანამდებობას ჩამოაშორა პრეზიდენტი და უფლებამოსილება ვიცე-პრეზიდენტს გადასცა, ის კი თანამდებობიდან გადადგა.

ყველაფერი ორშაბათს 30 სექტემბერს დაიწყო. კონგრესის დეპუტატებმა უარი თქვეს მხარი დაეჭირათ ვისკარას მიერ შეთავაზებული საკონსტიტუციო სასამართლოს რეფორმისთვის და სასამართლო კოლეგიის ახალი წევრები აირჩიეს. საპასუხოდ პრეზიდენტმა საკანონმდებლო ორგანო დაშალა და 26 იანვარს ვადამდელი საპარლამენტო არჩევნები დანიშნა.

ოპოზიციის წევრებმა, რომელთაც კონგრესში უმრავლესობა უჭირავთ, პრეზიდენტის ქმედებას სახელმწიფო გადატრიალება უწოდეს, ხოლო უშუალოდ ვისკარას — დიქტატორი.

ამის შემდეგ დეპუტატებმა მარტინ ვისკარას უფლებამოსილება ერთი წლით შეუზღუდეს და დროებით ლიდერად ვიცე-პრეზიდენტი მერსედეს არაოსი დანიშნეს. არაოსმა თავდაპირველად ფიცი დადო, თუმცა პირველ ოქტომბერს, საღამოს თანამდებობიდან გადადგა.

ყოფილი ვიცე-პრეზიდენტის განცხადებით, კონსტიტუციური წესრიგი დაშლილია და ქვეყანა სერიოზული ინსტიტუციური კრიზის წინაშე დგას. ამასთანავე, მას იმედი აქვს, რომ ეს ვადამდელ საპარლამენტო არჩევნებს ჩაუყრის საფუძველს.

ქვეყნის კონსტიტუცია ვისკარას უფლებას აძლევს, კონგრესი დაშალოს. პერუს პრეზიდენტის განმარტებით, კონგრესის კენჭისყრას მისთვის უფლებამოსილების შეჩერებაზე ძალა არ აქვს, რადგან საკანონმდებლო ორგანო უკვე დაშლილი იყო. გარდა ამისა, ვისკარას მხარს უჭერენ და ლეგიტიმურ მმართველად მიიჩნევენ არმიისა და პოლიციის ხელმძღვანელები.

ოპოზიციაში ამტკიცებენ, რომ კონგრესის დათხოვნით პრეზიდენტმა უფლებამოსილებას გადააჭარბა. კონგრესის შემდეგი სხდომა პარასკევს უნდა გაიმართოს. განსახილველი საკითხი თანამდებობიდან ვისკარას საბოლოო ჩამოშორება იქნება.

მარტინ ვისკარა პერუს პრეზიდენტი 2018 წელს გახდა. მან თანამდებობაზე პედრო პაბლო კუჩინსკი შეცვალა, რომელსაც ქრთამის აღებაში ადანაშაულებენ.